بهلول المشغول: علشان الحكومة تعيش

حتة جبنة قديمة
تبقى الأكلة عظيمة
لو مش لاقى عشايا
برضو بلادى كريمة
حبة فول حراتي
تبقى الأكلة ذواتي
جناح الفرخة الدايخة
غدايا أنا ومراتى
لبس الشتا عندى مافيش
ولو عريان ميهمنيش
أبيع الكلية بتاعت ابنى
لأجل حكومة بلدى تعيش
لازم أوفر أنا من زادى
وآجى شوية عليكو يا ولادى
علشان راتب أخونا يزيد
أصله وزير مش إنسان عادى
وعلشان أخونا التانى كمان
يجيب عربية ضد النيران
يحافظ بيها على حياته
أصله عضو في البرلمان
عايزة لحمة ليه يامنار
يا أم عيالي وست الدار
ماله المش ماله الفول؟!
دى حتى اللحمة بتاعت حمار