بهلول المشغول: الجنيه غلب الدولار.. زغرتي ياللي مش دريانة
وزارة راحت راحت
ووزارة جات
لا اتغير فينا شيء
ولا رخصت الحاجات
حكومتنا طلعت فجأة
قالت هعمل مفاجأة
غيرت كام محافظ
بكام شخصية باهتة
قالت افرحوا يا أولاد
أهو انتعش الاقتصاد
نزل خلاص الدولار
فجأة ومن غير ميعاد
هيص يا شعب معانا
وارقص يلا ويانا
الجنيه غلب الدولار
زغرتى لو مش دريانة
وأنا اللى نفسى أصدق
نزلت عشان أتسوق
لقيت الأسعار زادت
وفلوسى مش بتحوق
قالولى اسكت وافهم
وبلاش ترغى وتتكلم
بكره تشوف النتيجة
ومن حكومتك تتعلم
أنا قلت أدينى ساكت
ومراتى سابتنى ونامت
دا الشتا قرب يخلص
وماجبتش ليها جاكت
