«رئيس الوزراء» لـ «سطوطة الفنجري»: أكثر من 50 واحد رفضوا منصب الوزير.. قال إيه.. المرتبات ضعيفة!
طبعا كلكم عارفين العلاقة الحميمية التي تربطنى بالمهندس شريف إسماعيل رئيس وزراء مصر.. وجميعكم تتابعون سلسلة حواراتى معه مؤخرا.. الراجل ياحرام كان بعقله لغاية الشهر اللى فات.. لم تهزه انتقادات الشعب لحكومته التي قررت تعويم الجنيه في ظروف غامضة.. ولم ترعبه تهديدات البعض بثورة الغلابة في الشوارع والميادين بسبب غلاء الأسعار.. بل لم يلتفت لمطالبات بعض النواب بسحب الثقة من حكومته.. من الآخر كدا.. شريف إسماعيل ضد التهديد أو الترهيب
كنت كلما ألتقى به أقول له: الشعب «فّيّص» منك يا معالى دولة الوزير ومن حكومتك.. فيقول ضاحكا: كّلى عيشك في البلد دى يا سطوطة أحسن لك.
شريف إسماعيل الذي لم نره خرج من مصر طوال مدة رئاسته للحكومة.. قرر فجأة أن يصطحب وفدا سريا ويسافر إلى الكويت لحضور حدث دولي هام وهو حفل زفاف نجل الأمير «هاشم حمد آل الصباح» أحد أمراء الأسرة الحاكمة هناك.
كنت أنا واحدة ممن دعاهم المهندس شريف لمرافقته في هذه الرحلة لعلمه بأن الأمير هاشم صديق شخصى لى وأننى سأذهب كدا كدا لحضور الفرح المهم..
وداخل الطائرة قلت له: يعنى أنت سيادتك مافيش مؤتمر خارج مصر شاركت فيه.. ولا عمرنا سمعنا أن رئيس الحكومة سافر لحضور أي فعاليات خارج مصر.. لدرجة أن صحفى الشئون الخارجية «مصطفى بركات» كتب على صفحته الخاصة بفيس بوك «أنا نفسى قبل ما أموت اقرأ خبر عن سفر رئيس الوزراء لحضور أي فعاليات خارج مصر».. قولى سيادتك بقى: اشمعنى الفرح دا اللى أنت سافرت له؟!
قال: سفر إيه بس وبتاع إيه يا سطوطة.. هو أنا خلصت المشكلات اللى في البلد علشان أسافر أناقش مشكلات الخارج؟!.. البركة في وزير الخارجية أهو قايم بالواجب ومقضيها سفريات ومؤتمرات ومحناش شايفين من وراه أي نتيجة أصلا.
قلت: بينى وبينك يا باشا كل وزراء حكومتك لا بيقدموا ولا بيأخروا والشعب بياكل في نفسه والرئيس السيسي غُلُب مع وزرائك.
قال: أدينا ياستى هنغير كام وزير كدا علشان نخزى العين!
قلت: ما هو ما فيش حد موافق يبقى وزير في البلد!
قال: أي والله يا سطوطة يا بنتى.. وأنا رشحت أكثر من ٥٠ نفر للوزارات ومحدش وافق واللى مجننى إن الوزراء الموجودين عايزين زيادة في مرتباتهم!
وأنا بالفعل طالبت البرلمان بالموافقة على زيادة مرتبات وزراء الحكومة.. ما هم برضو معزورين يا ستى!
قلت: لا والله؟!
قال: كل الوزراء في الأصل رجال أعمال وأصحاب وظائف عليا.. يعنى دخل أقل واحد فيهم لا يقل عن 250 ألف جنيه.. يعنى ربع مليون جنيه في الشهر والاسم موظف حكومة.. دا غير رجال الأعمال طبعا.
حطى نفسك مكان أقل واحد فيهم وقوليلى إنتى بقى هتعيشى إزاى وسط الغلاء اللى إحنا شايفينوا...
قلت: طب ومرتبات الشعب اللى مش لاقى ياكُل؟!
قال: أديكى قلتى مش لاقى ياكُل.. خلينا في الناس اللى متعودة تاكُل علشان مانتعبهمش هما كمان!
