البااارلمنجي: نائبنا عنده شعرة.. ساعة تروح وساعة تيجي

بصراحة أنا احترت في نواب دايرتنا اللى رزقنا بيهم ربنا.. ساعات بيبقوا معانا _كدا وكدا يعنى_ وساعات ما بيشيلوش همنا _ودا اللى بيحصل غالبا يعنى_ لأنهم مش فاضيين لأمثالنا.. هما فاضيين للحكومة.. شغلهم الشاغل الحكومة.. كيف نرضى الحكومة.. كيف نوافق على مقترحات الحكومة.. ومؤخرًا كيف ننتقد أداء الحكومة.. بس مش كل الحكومة.. ننتقد الوزراء اللى شايفين إنهم خلاص هيتشالوا في التعديل الوزاري.
عندنا نائب في دايرتنا دايما تحت الطلب.. الحكومة تقترح زراعة القمح مرتين في السنة فيخرج علينا مهللا بالاقتراح الجلل ويعلن موافقته.. بل يعلن في الدائرة أنه هو الذي طالب الحكومة بذلك حرصًا منه على مصالح أبناء دائرته المزارعين.. وهو ينسى تمامًا أن القمح لا يصلح للزراعة مرتين في السنة لأنه ببساطة يحتاج لظروف مناخية معينة هي التي يتم زراعته فيها.. يعنى مافيش مزارع بيزرع القمح مرتين في السنة منذ أيام أجدادنا الفراعنة ربنا يبشبش الطوبة اللى تحت راسهم.
ونائبنا الثانى عنده شعرة.. ساعة تروح وساعة تيجى.. يعنى مرة تلاقيه مع ثورة يناير وشهدائها.. ومرة تلاقيه بيقول عليها مؤامرة ويلعن سنسفيل أبو اللى جابها.. ودا طبعا حسب المكان اللى هو قاعد فيه وحسب الشخصيات اللى قدام معاليه.. وربنا يديم عليكم نعمة اختياراتكم يا أهل دائرتى.. فهؤلاء هم نوابكم الذين صوتم لهم على حسابى أنا الذي أعيش همومكم وأعانى معاناتكم.
مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.