البارلمنجي: ضربوا النائب على عينه.. قال خسرانة خسرانة

يبدو أن السادة نواب دايرتنا تعودوا على كلامنا.. ما بقاش يحوق فيهم.. هما فاكرين إننا مثلا حاسدينهم على الميغة اللى هما فيها.. أو حاقدين عليهم لأنهم وصلوا للبرلمان وإحنا لأ.. أو جايز يكونوا تعلموا من وزراء الحكومة وهم يتعاملون مع الشعب بمبدأ «الكلاب تعوى.. والقافلة تسير».. جايز!!

أنا بقى جمعتكم النهاردة يا أهل دائرتى الكرام علشان أسمع منكم كم الخدمات اللى قدمها لنا نواب دايرتنا المبجلين.. ها.. حد يقدر يرد عليا؟!.. طبعا مافيش.. عموما هي دى نتيجة اختياراتكم بعدما تخليتم عنى أنا ابن دائرتكم حامل همومكم ورحتم تلهثون خلف أصحاب الوعود المعسولة.

أنا النهارده مش ناوى أشمت فيكم وأفكركم إنكم تستحقون ما أنتم فيه بسبب اختياراتكم.. لا أبدا خالص.. أنا بس حبيت أقول لنوابنا من خلالكم: أنتم فين من أهالي الدايرة.. طب مشغولين عننا بإيه.. هل أنتم مثلا مشغولون عن هموما بالتشريعات؟!.. أنا لا أظن.. لأن الحكومة بتعمل اللى هي عايزاه وهى التي تشرع وأنتم فقط توافقون.

سايبين الحكومة تدهس فينا.. حتى الدواء ما بقاش في متناول أيدينا.. أنا نفسى أشوف نائب يطالب الحكومة بالتقشف والترشيد اللى بيطالبونا به.. نفسى نائب يصرخ في وجه أي وزير ولو من باب الوجاهة كما يفعل زملاؤهم من النواب اللى بنشوفهم في برامج التوك شو ويطالب بحياة كريمة لأهل الدايرة.

لكن يبدو أن نواب دايرتنا اتعودوا على تجاهل مشاكلنا.. واتعودوا كمان على انتقاداتنا ليهم.. واتعودوا على أن الحكومة بتعمل اللى هي عايزاه.. وقرروا إنهم يشوفوا مصلحتهم بقى لأنهم عارفين أن الدورة الجاية مالهمش فيها.

نوابنا حاليا يتعاملون بالمثل الشعبى «ضربوا الأعور على عينه.. قال خسرانة خسرانة».. يعنى بالبلدى كدا ما تستنوش من نائب أنه يعادى الحكومة علشان خاطركم مهما نقدتم فشله في تحقيق مطالبكم.
وأقول قولى هذا واستغفر الله لى ولكم.

مع تحياتى: أخوكم «نزيه صندوق عبد المتعال الناخب» الشهير بالبااارلمنجى.. نائب ساقط ببرلمان 2016.