البااارلمنجي: ابن الدايرة المبرراتي.. دايما بيهاتي.. افتكرناه ناشط.. طلع فلاتي

أنا جمعتكم النهارده يا أبناء دايرتي علشان أقولكم كلمتين.. وأفرجكم على نواب دايرتنا اللي حضراتكم انتخبتوهم.. وأنا مش جاي أشمت في حد لا سمح الله.. لكنني جاي زي كل أسبوع علشان نعرف سوا نتيجة اختياراتكم..

واحد من نواب دايرتنا المحترمين قاعد في المجلس بس علشان يُدلي بتصريحات للإعلام.. وياليتها تصريحات عن إنجازات مثلًا أو خطط تنمية.. لأ خالص أبسبيوتلي.. هو قاعد بس علشان يبرر تصرفات نواب تانيين و يبيض وجوههم قدام الشعب مع إنهم نواب من دواير تانية ملناش مصلحة معاهم.

و الحكاية بقى أن الدكتور عبد العال اصطحب مجموعة من النواب اللى بيرتاح لهم وراح يزور المتحف المصري بعد صلاة المغرب.. الراجل استغل أن وزير الآثار موجود فقال أهو يشرحلنا شوية التماثيل اللي في المتحف دي معناها إيه.. حاجة عادية يعني.. خاصة أن المتحف فتح الزيارة في الفترة المسائية، وكده كده النواب مرهقين فحبوا يرفهوا عن أنفسهم شويتين.
قوم إيه بقى سيادة النائب ابن دايرتنا ينشر في الصحف أن رئيس البرلمان كان في زيارة مهمة للمتحف المصري، ومعه وزير الآثار ومجموعة من النواب دعمًا للسياحة المصرية وللترويج لها عالميًا.

قال يعني زيارة عم عبد العال للمتحف هى اللي هتنشط أم السياحة.. حاجة تموت من الضحك طبعًا.. والأغرب من كده بقى أن نائبنا أضاف أن زيارة النواب، تعطي انطباعًا للعالم عن توافر الأمن والأمان بميدان التحرير و داخل المتحف!
صاحبنا قال كده رغم أن النواب حبوا يتمشوا شوية، خاصة أن المتحف على بعد خطوتين من البرلمان.. يعني في ميدان التحرير برضو..

يعني يا سيادة النائب أنت شايف أن السياح في أوروبا وأمريكا وبلاد الواق واق قاعدين بيتابعوا تحركات عم عبد العال ونوابه؟! جايز يا سيدي.
أدى ياعم ابن دايرتنا.. دائمًا كده قاعد بيهاتي.. كنا فاكرينه ناشط و أهو طلع فلاتي.. منكم لله بقى أنتم السبب.

مع تحياتي: أخوكم «نزيه صندوق عبد المتعال الناخب»، نائب ساقط ببرلمان 2016.