بهلول المشغول: يكفينا شر انتكاساتك
حلقاتك برجالاتك
مر أسبوع بحياتك
يا عام 2017
يكفينا شر انتكاساتك
يكفينا شر الأسعار
تولع أكتر وتبقى نار
يكفينا شر الغش
وأكل لحم الحمار
يكفينا شر التنازل
والخسة في التدبير
ونائب يعمل راجل
يفرط في جزيرة صنافير
يكفينا شر الإهمال
شر تكاسل العمال
شر اللي بياخد رشوة
من قوتنا وقوت العيال
ياعام يا جديد علينا
لو تاخد نور عينينا
ابنيلنا مصر جميلة
وراعي ربنا فينا
ياعام في أول شهورك
هتعدى وراح تاخد دورك
لا تذود همنا وحياتك
وعُملتنا تغرق في بحورك
يا عام هونها علينا
الأدوية غليت علينا
والصيدلى مابقاش دكتور
بندهله وأقوله يا بلدينا
