بهلول المشغول: عمك شنطح جالك ينطح
أنا الوابور.. توت توت
شايف حكومة بتبنى بيوت
حطت سعر باعت بيه
والغلبان أخد الشلوت
كف بكف ضرب الغلبان
بكى بدموعه للبرلمان
سيادة النائب هرش دماغه
وافتكر «إنو» ماخدش كمان
راح لزمايله يشخط يُنتُر
عايز شقة لنفسه كمان
ردوا عليه وقالولوا تُؤمُر
هنشوف لجنة الإسكان
أخد الشقة ودفع الفكة
ورجع الدايرة للجدعان
قعد معاهم فوق الدكة
يوعد إنه مع الغلبان
حطة يابطة يادقن القطة
إهرى ياشعب بفلفل شطة
آدى نواب وأدى حكومة
دخلوا علينا بزفة أونطة
عمك شنطح جالك ينطح
شافك دايخ راح يتمرجح
قالك إفرح مصر بتفرح
واهو قفاك بيلعب صّلّح
