بهلول المشغول: جاوبيني بقى يا حكومة
أنا هعمل نفسي نايم
وهعيش كدا مش فاهم
وبالمره عشان ترتاحي
اعتبري إني صايم
لا عمري هطلب وظيفه
ولا حتى لقمة نضيفه
هسكن في أي حته
وهقول عيشتي لطيفه
راح أسيب مراتي بكره
وأعيش كدا عالذكرى
لا هطلب هدمه صوف
ولا حتى جينز ليكرا
هكون مواطن هادي
عايش كدا في العادي
مستني إنجازاتك
صابر ساكت وراضي
وهسيبني مـ المغرضين
اللي ماهماش شايفين
غير إنك حكومة فاشله
ودافنة رأسك في الطين
لكن أنا نفسي أعرف
قبل ما ادخل أنام
هفضل لحد إمتى
رابط ليكي الحزام
جاوبيني بقى يا حكومة
أفهم بس المنظومه
وأنا هصدق كلامك
وحياة ستي هنومه
