«يا تكاته يا حركاته»
مساء الفل على حضرتك عزيزي القارئ أهلًا بيك معانا في حلقة جديدة من برنامج "يا تكاته يا حركاته"، ناس كتير كانت بتبعتلنا وعايزة إننا نعمل أنواع أكل كتير، لكن إحنا النهاردة قررنا نعمل أكلة مُختلفة وهي"طريقة تحضير الشخصية من تاني..".!
طبعًا كلنا عارفين ظروف الدنيا البايخة اللي عايشينها، وكم التفاصيل اللي فيها، ووسط كل ده حضرتك محتاج شخصية قوية تعرف تقابل بيها كل الصدمات دي، وخصوصًا بعد ما الشخصية الأولانية ادمرت.
ورقة وقلم وعايزك تكتب ورايا المقادير وتركز:
١- جزء كبير من الطموح.
٢- شوية قليلة من ماضيك "يادوبك خُد اللي ينفعك"
٣- نُص أوجاعك اللي ربنا كان ساندك فيها، والنُص التاني اللي ربنا مخلكش تحس بيه أصلًا.
٤- كمية كبيرة من الأمل + ابتسامة صافية.
٥- تجيب كل أهلك على حبايبك ومعاهم اللي غاوي يقدرك وتفضل حاططهم قدامك، وده علشان ماتنساش أبدًا إن في ناس بتعلّي من قيمتك.
٦- تسيب كل حاجة على الله. "بجد مش مُجرد كلام ها!"
٧- طبعًا ياريت ماننساش شوية البُهارات اللي هتكون فوق الشخصية (أوجاعك- دموعك- أيام تعبك) دي حاجات بتكون سبايسي كدة على وش الأكلة، لكن من المؤكد هتدي الشخصية طعم، لازم تدوبها أوي في شخصيتك لأنها بتخلّي المسئولية ريحتها ملعلعة.!
٨- ممنوع منعًا باتًا إنك تستخدم كلام الناس في شخصيتك، وخليك دايمًا فاكر إن في حاجات كتير وهايفة لكن ممكن تبوظ الأكلة.
تحط كل المقادير دي على بعضها، وتدخلها جوه الفرن، وتسيبها تستوي على الآخر، سواء بقي كانت الفرن دي (زمن- مرض- علاقة فاشلة) أي حاجة.. المهم إن الشخصية دي هتستوي كويس وهتطلع فاهمة حاجات كتير، وأوعاك تطفي على الأكلة، وهي لسة ماستوتش وتقول خلاص كفاية!
سيبها جوه الفرن لحد ما ربنا يقرر، وكل ما النار تزيد أكتر، أعرف إن الشخصية دي لازم لازم هتكون في الآخر طعمها حلو وهتشبع ناس كتير بخبرتها وباللي شافته.
بعد ماتطلع من المشكلة قصدي من الفرن، أشكر ربنا دايمًا إنك استويت بس ماتحرقتش، وإن كل المقادير القاسية دي عملت منك إنسان مُحترم وفاهم اللي بيحصل، وبقيت طبق رئيسي وكل اللي على الترابيزة واخدين بالهم منه مش مُجرد طبق فاضي مستني حد يملاه بأي كلام.
أما بقي لو في الآخر لا قدر الله الشخصية دي طلعت بايظة وملهاش طعم، جرب طريقة التحضير دي مرة واتنين وتلاتة لحد ماتوصل للطعم الحلو، والشخصية المحبوبة ليك، واللي تكون راضي عنها، وتعرف تقدمها لكل الناس وإنت عينيك مليانة، وخليك فاكر وجودك في الفرن أول مرة يفرق كتير عن آخر مرة.
