عزيزي القدر.. كفاية
حاجات كتير في حياتنا، محتاجة تسمع مننا ذلك اللفظ المُريح، واللي مليان أسرار كتير، حاجات كتير حوالينا محتاجة تبطل أصلًا إنها تحصل، ولازم يتقالها كفاية فأنا قررت أكتب وأقول كفاية لحبيبي وصاحبي وعشرة عُمري "القدر".
عزيزي القدر:
مساء الخير، تحية طيبة وبعد..
أنا عارف إنك ماتعرفنيش، بس أنا والله أعرفك أوي، وعز المعرفة كمان، مش عارف أبدأ معاك الموضوع منين لأن دي المرة رقم مليون أكلمك فيها، وإنت برضو مُصمم تعمل اللي في دماغك وبس، ومش مهم أنا، بُص أنا مش هطول عليك لأن أنا عارف إنك أكيد دلوقتي مشغول وبتحضرلي مُصيبة حلوة من بتوعك، أنا بس كُنت جي أقولك كفاية.. ويارب تفهم اللي هكتبه وتحن عليا بشوية ظروف حلوة..
أنا بس عايزك تركز معايا اوي.. مبدأيًا كدة..
كفاية أڤورة في الأحداث، كفاية اصطناع بين الناس وبعضها، اللي قولي صحيح هو يعني إيه واحد يقول لواحد تاني بحبك وهو من جواه غِل وكره وسواد رهيب ؟
يعني أيه يكون في حد بيكره أصلًا، إزاي يكون بيعرف ربنا وبيكره، إذا كان الله نفسه محبة، ماهي حاجة من الاتنين يا مش عارف يحب يا مش عارف ربنا.!!
ياريت كمان تقول للي نحوا كفاية اهتمام بالنفس وحب الظهور اللي بقي على الفاضي والمليان، قول كمان للي نفسه يبان ده..
كفاية تعيش عُمرك كله بتحاول تثبت للناس أهميتك وفي الآخر نكتشف إنك فاضي، فاضي جدًا كمان، لأ وأيه فاضي وبيعمل مليان، طب ياسيدي وفر وقتك وجُهدك وذهنك اللي شغال ده وأعمل حاجة تنفع بيها غيرك، أو على الأقل تنفع بيها نفسك.!
عايز أقولك كمان كفاية أنانية وغرور وبحث على المصلحة وبس، ومش مهم الباقي يولع عادي، أو حتى يموت بس المهم أن الأناني يعيش، هو في الحقيقة أه هيعيش بس ياتري هتكون إيه الفايدة من العيشة دي ؟!
كفاية وجع وألم وفراق وكفاية علينا تفاصيل الدنيا البايخة اللي أصلًا مابتخلصش، وكفاية بقي ناس جت حياتنا ومشيوا فجأة وبدون حتى أي مقدمات، ولا أسباب ولا أي حاجة، لأن ده في حد ذاته هم مؤلم جدًا، وطلبت منك قبل كدة تشيل من حياتي الناس دي وبرضه بتعمل اللي في دماغك وبس وكأنك مش قدري مثلًا.!
وبقولك إيه صحيح، كفاية بطالة وتحرش وواسطة وتعصب وتعليم غلط وزحمة وبلطجة وشتيمة وصوت عالي وقلق وسرقة وحوادث وانفجارات.. كفاية يا عم القدر وحاول تحن علينا شوية.. حاول تفهم يعني إيه كلمة إنسان.. أنا عارف إنك مش هتهتم بالرسالة لأنك ممكن ماتقرهاش أصلًا، بس أنا قُلت أكتب اللي مضايقني منك يمكن أعرف أغيره..
أنا أصلًا مش عارف أنا إيه اللي ساحلني معاك ومخليني أكتبلك كل ده وأنا عارف ومتأكد إن ربنا موجود وهو ممكن يحل.!!
بقولك يا سي القدر إنت كمل زي مانت والله.. لأن إنت كل ما بتسوء أكتر كل مانا بعرف ربنا أكتر وأكتر.. يعني برضه أنا في الآخر اللي كسبان.
إمضاء: واحد طلعان عينه منك.
