البااااارلمنجي: تجوع الحرة ولا تأكل بثدييها

وقال على رأى المثل: "اللى يعيش ياما هيشوف واللى يمشى يشوف أكتر".. وأنا بصراحة شفت العجب دون أن أتحرك من مكانى.. يكفيك أن تقرأ أخبار البرلمان المصرى وسترى العجب العجاب دون أن تجهد قدميك بالمشى ولا حتى بالوقوف عليها.

وأنا بقى جمعتكم النهاردة يا أهل دايرتى علشان بس تشوفوا نوابكم اللى حضراتكم اخترتوهم وأعطيتوهم أصواتكم التي بخلتم بها على العبد لله.. فها هو أحد الذين يمثلونكم تحت القبة يريد أن يبيع الجنسية المصرية للى يدفع أكتر.

أي والله زمبقولكم كدا.. لأ وإيه.. يقوم عضو برلمانى تانى يبرر كلام الأولانى ويقولك إننا ممكن نعطى الجنسية للى يدفع بس بعد 5 سنوات علشان نضمن أنه هيشغل فلوسه في مصر مش هياخد الجنسية ويفلسع.. يعنى لو واحد عايز يغسل أمواله ييجى مصر وياخد الجنسية ويغسل وينشر براحته ويروح يعيش في بلده عادى وماحدش يقدر يحاكمه هناك لأنه بقى مصرى.

الجديد بقى في الموضوع أن هناك عائلات كاملة في بعض الدول العربية زى الكويت والسعودية وباقى دول الخليج عايشين هناك بدون جنسية والدولة لا تعترف بهم.. الناس دى بقى فرحانة بالنائب المخضرم صاحب الاقتراح.