الخطايا العشرة
الواحد لما بيكبر بيكتشف إنه اتعلم حاجات كتير غير بتاعة المدرسة، حاجات كان بيسمع عنها من بعيد لبعيد بس ماكانش يعرف إنه لو كبر كده كده لازم هيخبط فيها!
علشان تعيش كويس في الدنيا لازم تتجنب عشر خطايا مهمين جدًا، تتجنبهم علشان توصل لشيء أهم وهو.."راحة بالك"
الخطية الأولى: التسليم
أوعاك تسلم حياتك لحد، ولا تعتمد إن فلان ده موجود ومعاك، وخليك فاكر إن اللي معاك دلوقتي مش معاك بكرة، وإن التسليم لغير الله مذلّة.
الخطية الثانية: العشم وسنينه
كل حاجة في دُنيتك لازم يكون ليها حدود، ولو مابتعرفش تحط حدود لازم تتعلم.. لازم جدًا كمان، وأهم حاجة لازم يتحطلها حدود هي "عشمك" بالناس، علشان العشم ده عامل زي الإدمان، الاتنين آخرتهم وحشة.
الخطية الثالثة: صداع الدنيا
وأنت ماشي في الدنيا هتشوف إن اللي بيحبك كتير، بس اللي بيكرهك أكتر بكتير، وطول ماأنت قوي يبقي عدوك أكيد إحساسه بضعفه لسه مسيطر عليه، وهيلجأ للتشويه، هيقول ويعيد لحد مايصدعك، هو يقول وأنت تعمل مش من هنا، لأن كل صداع وله المُسكن بتاعه، فخلّي اللي يقول يقول.
الخطية الرابعة: قلة الأصل
قلة الأصل دي مرض مابينتهيش، وقليل الأصل موجود أكتر من أزايز المية الساقعة اللي في حياتك، أوعاك ترد الندالة بندالة، واجبر قليل الأصل على احترامك، ساعتها بس هتحس بقيمة تربيتك.
الخطية الخامسة: العوم
البحر حلو لكن نهايته مش مضمونة، وطول ماانت بتلعب على الشط فانت في مُنتهي الأمان، والبني آدمين يشبهوا البحر في حاجات كتير، وكل ماتتعمق وتخش جواهم كل ماخوفك لتغرق يكتر، فحاول على قد ماتقدر تعوم من برة وتسطح العلاقات.
الخطية السادسة: المرايا
إنك تقف قدام مرايتك ده مش عيب، بالعكس ده إنت مُهتم بنفسك ونفسك تطور منها كمان، العيب إنك تقف وتركز في التعاوير اللي في وشك وتخليها تلهيك عن إنك ترجع من تاني وتمنجه نفسك.
الخطية السابعة: السمع
المحبطين كتير، والكذابين مش بيتوبوا وما بيزهقوش، هتلاقي الكلام السلبي متنطور حواليك زي لبسك وانت لسه جاي من السفر، لازم تقفل ودنك عن الكلام ده وماتسمعش غير اللي هيفيدك وبس، وصدقني مسيرك تثبت للمحبط إنك كُنت صح ويجي اليوم ويشجعك.
الخطية الثامنة: الحب
إنك تتحب دي نعمة، وإنك تتكره ده عدم قبول مش عيب فيك، طول ماانت بترضي اللي خلقك، حاول على قد ماتقدر تحبب فيك خلقه، وتغير من نفسك علشان نفسك.. الحب مش موجود غير في قلوب اللي عارفين قيمة الله.. لأن ببساطة الله محبة، فلما تكره مش هتكون عارفة.
الخطية التاسعة: السُمعة
كل واحد فينا حب وبيحب وهيتحب، ومفيش علاقة كاملة، ولا حب لازم يدوم، ومراحل البُعد دارجة وبتحصل، اوعي بعد ماتخرج من علاقة تتكلم على اللي كان معاك، لأنه في يوم من الأيام كان هيشيل اسمك، أوعي تيجي على اللي كان بينكم وتدوس على الأحلام والظروف وكل الحلو اللي حصل، وماتنساش إن كلام الناس لا بيقدم ولا بيأخر.
الخطية العاشرة: ماتركزش
أكبر خطية ممكن تكون عملتها دلوقتي هي إنك لما كنت بتقرأ المقال ده قُلت في سرك طب هو اللي كتب الكلام ده بيعمله ولا عامل فيها فلحوص؟
أوعي.. أوعي تحكم على حد وإنت ماتعرفش ظروفه.
