بالصور.. أطرف المواقف المحرجة لرواد «فيس بوك» مع الأطفال.. إيمان: «أختي بتقول خدنا اغتصاب منزلي في المدرسة».. عبد الله: «قالي يا الضرب يا الأكل».. سارة: «حطيت بنت عم

روى مستخدمو موقع التواصل الاجتماعى "فيس بوك" بعض مواقفهم الطريفة والمحرجة مع الأطفال خلال صفحة "الكومنت الفصيل".

- لغة عربية
قال أحمد: "فكرني بابن ابن عمتي الصغير كان بيحب الكارتون المدبلج وحافظه كله تقريبا.. في مره بندهله من تحت البيت عشان يحدفلى المفتاح.. قالي لا ترهق نفسك بالصعود أنا قادم إليك".

- اغتصاب منزلى
وأضافت إيمان: "أختي الصغيرة أول مرة خدت اقتصاد منزلي في المدرسة جاية تقول إحنا خدنا اغتصاب منزلي.. أقسم بالله وقعت على الأرض من الضحك".

- كله إلا الأكل
وروي لوكا: "كنت جاي من درس رياضة بره البلد اللي أنا فيها فا أنا ميت من الجوع وكان معايا 5 جنيه قولت أجيب أكل واروح مشي وخلاص جبت طبف كشري بالـ5 جنيه، فقابلني عيل صغير من قريتنا ماشي معايا هو وأمه في نفس الطريق عيل صغير لقيته بيقول لأمه انا عاوز من دا وقعد يعيط وانا عامل مش واخد بالي لقيت أمه بتنادي عليا روحت مطلع التليفون وبصوت عالي مين مات؟ وروحت واخد نفسي وجريت".

- كف خماسي
وقالت سارة: "بنت عمي سنة ونص ريتا.. تخيل كنت مندمجة في اللعب معاها وبنضحك تقوم فجأة وبدون أي مقدمات رزعاني كف خماسي على وشي وتقولي يابب يعني ياكلب".

وأضاف أسامة: "طفل صغير جده كان بييجي يقعد مع جيرانا.. فكان جارنا بيجيب كوباية شاي لجده فالواد شافه في يوم راح لجارنا وقعد معاه فجارنا مجبلوش شاي قام الواد قيله إيه ياعم مش هتجيب شاي ولا إيه الراجل بص في الأرض ووشه قلب ألوان".

- لدغة الراء
وقالت نهاد: "آه كنت في مرة ماشية في الشارع ومعايا بنت أختى الصغيرة، وفجأة لقينا كلبين روحت حطتها قدامي عشان الكلاب يعضوها هي الأول".

وأضافت آية: "أنا لدغة في حرف الراء والواد ابن أختي ألدغ في حرف الراء هو كمان فبقوله قول ريري كدا فيقولها بطريقة مسخرة.. فبقوله لا مش كدا قول ورايا بس ريري فيقوم قايلها بطريقة مسخرة.. فبقوله مفيش فايدة مش راضي تتعلم".

وقالت رضوى: "كان نفسي أجرب شيكولاتة كيندر اللي بتكسب لعبة للأطفال وجبتها بس مكنتش عارفة افتحها وشفت بالصدفة واحدة صحبتي هي وابنها 4 سنين، والواد قالي هاتيها وأنا هعرف افتحهالك واديتهاله وسبته يفتحها وانا فضلت اتكلم مه أمه وببص عليه لقيت الواد مفترك الشيكولاتة وواكلها، معملتش أي رد فعل غير أني مشيت وسبتله اللعبة كمان وأنا حاسة أن هيجيني سكتة على حق الشيكولاتة".

- بقيتى عروسة
وروت إسراء: "طفلة عندي في الحضانة جت يوم بدري ومدخلتش الكلاس بتاعها وقعدت قدامي بصالى فترة كده ولقتها حطت إيدها على دقنها وابتسمت وقالتلي ميس إسراء إنتي بقيتي عروسة وبتتكلم بمنتهى الجدية لدرجة إني حسيت اللي قاعدة قدامي الخاطبة مش طفلة عندها 5 سنين وأنا اتكسفت".

- يا الضرب يا الأكل
وقال عبدالله: "كنت بفطر عند أختى مرة، ابنها اسمه يس عنده 4 سنين جابلي طبق تفاح وأنا أخدت واحدة واكلتها لقيتو جايب عصاية كبيرة ونازل ضرب فيا بيها عشان أكمل طبق التفاح، لا وإيه مكنش بيهزر وربنا فضل يضرب فيا ضرب مضربتهوش من وأنا عندي 7 سنين، وبعد أما أكلت التفاح شدني من إيدي وداني عند التلاجة خلاني أطلع عنب عشان أكلو كان ييجي 5 كيلو عنب، بس الحمدالله نام وأنا لسه في أول واحدة عنب".

- كسفة
وأضافت أسماء: "بنت أخويا عندها سنتين كل ما أروح عندهم تجري عليا.. وأنا دخلة بيت بابا أنا وجوزي بقوله هنادي عليها عشان تجيلي جري من جوه رحت بكل ثقة بقول ياريمااااس جت تجري وأنا فاتحة دراعاتي ليها وعدتني وراحت لجوزي ومقولكوش على الكسفة والضحك والذل اللي اتذليته.. أسماء بنت أخويا كسفتنى قدام جوزى".