بالفيديو.. والدة ضحية «محول الكهرباء»: «عايزة حق بنتي»
لم يترك الإهمال "فايزة- 3 سنوات"، تلهو ببراءتها، ليغتالها محول كهرباء مكشوف في مصر القديمة.
التقت "فيتو" بوالدة الضحية ووالدها بمنطقة مصر القديمة لمعرفة تفاصيل الواقعة.
وقال والد الضحية مستاءً: "كابينة الكهرباء بقالها أكثر من سنة ونص على نفس الحال، يرضي مين بنتي تموت الموتة دي؟، وما جوش ركبوا باب الكابينة غير من بعد موت بنتي"، وتساءل قائلا: "كان لازم روح تروح علشان يقفلوها".
وأضافت والدة الضحية باكية: "خرجت وأخدتها معايا نشتري شوية حاجات من السوق وإحنا راجعين كانت جنبي فجأة ما لاقيتهاش برجع تاني لاقيت الناس بتصوت وبتصرخ، لحد ما رميت اللي في أيدي وعرفت إن قوة الهواء شفطت بنتي جوه الكابينة" وأضافت: "ما كنتش أعرف إنها مفتوحة، لأن دايما الجيران بتحط خشبة تقفلها بيها خوفا على أطفال المنطقة لكن المرة ديه ما كنتش الخشبة موجودة".
و قالت والدة الطفلة: "عايزة حق بنتي.. جنبها اليمين كله اتشفط قدام عيني وما عرفناش نعملها حاجة"، وأضاف والدها: "اللي الناس تحكم بيه عاوزه..عاوز اللي يرضي ربنا.. ذنبها إيه الطفلة دي؟".
وكان ضباط مباحث قسم شرطة مصر القديمة تلقوا بلاغًا يفيد بتفحم جثة طفلة بسبب ملامستها كابينة كهرباء مكشوفة بمنطقة مصر القديمة، وتحرر المحضر اللازم.
