صابر الجمل يكتب: «لسه عيدك بإيدك»
لسه عيدك بإيدك
عيدك لسه مجاش
طول السنين وانتي صايمة
وغيرك عايش بلاش
وانتي اللي غلبانة
وانتي اللي شاقيانة
وصيامك طال
ومالك مال
وحالك حال
والسنين يا إما بتجري
وانتي ليه بين الأمم
نهجانة حتى ف وقوفك
تعبانة دايما.. بشوفك
وولادك ماسكين في النار
كأن ليهم حداكي تار
تايهين ومتوهينك
حاسدين فيكي أنينك
شالوا بإيديهم طرحتك
عروا جبينك
وسابوكي بين نياب السباع
تبكي عالعمر اللي ضاع
وتشتكي مر السؤال
للغريب لما القريب باع
أيوا لسه عيدك مجاش
بس عيدك لسه بإيدك
مفيش صيام بالسنين
قومي شوفي هلالك
من فوق المقطم
في حضرة السلطان المعظم
قومي بيعي اللي خانك
وقربي الغلابة
وإنتي وياهم
وإنتي بيهم
هتعودي تاني
جملة أماني
وهيجيلك كل يوم عيد
