بهلول المشغول: الإخوانى مش إرهابى والضابط زى العسل
أنا قلت اقوم أديها لفة
نحون شوارع المحروسة
واشوف الناس ساكتة ليه
صايمة ولا مكسوفة
مافيش أخبار ع الفيس
لا كدب ولا تهييس
مافيش تلفيق تُهم
وتويتر هجره إبليس
سألت نفسى إيه السبب
فين المشكلات فين التعب
حتى المواقع الإخبارية
أخبارها لا تثير العجب
مافيش فلان قال
مافيش فلان عمل
الإخوانى مابقاش إرهابى
والضابط بقى زى العسل
لقيت السبب في الصيام
ماهو الصايم قليل الكلام
حتى الفاطر لو حب يكدب
بيتكسف من المدام
سألت نفسى كمان سؤال
وسألته برضه لأم العيال
لو إحنا في أخبارنا صادقين
مش كنا رددناها واحنا صايمين؟!
وانا عمكم بهلول
اللى بيكم دايمًا مشغول
هرجع تانى واقول
ياريت منكدبش علطول.
