بالصور.. حقيقة الزحام على حجز وحدات «ماونتن فيو»
طوابير من البشر أمام "سيتي ستارز" لحجز الوحدات السكنية في مشروع "ماونتن فيو"، حيث بدأ الناس في التوافد منذ ساعات الصباح الأولى يوم السبت 28 مايو، وبالرغم من أن الوحدة السكنية قد يزيد سعرها عن المليون جنيه، لكن الطوابير وعدد الناس قُدر بالآلاف وهو ما لفت انتباه كثير من المارة، حتى أن البعض أطلق عليها "مليونية ماونتن فيو"، لكن للحكاية بُعد آخر سردته أحد السيدات اللاتي شاركن في تلك الطوابير.
بدأت الحكاية عندما كتبت ريم مهنا، أحد المشاركات في الطابور والتي أرادت حجز وحدة بالمشروع، على صفحتها الشخصية بفيس بوك، لتوضح ما وُصف بـ"حقيقة ماونتن فيو" فقالت "انا وقفت في طابور Mountain view.. بالنسبة للصور المنشورة عن الحجز في المشروع الجديد Mouantain View. انا كنت هناك. وده اللي عايزاه الشركة. تجمهر شديد بره يسوقوا بيه. فللأسف كانت تجربة شديدة الإهانة. البياعين كانوا بيكلمونا كل ساعتين في الأسبوع ال قبل الحدث الضخم!! علشان يتأكدوا اننا رايحين واننا اخدنا الدعوة لأنها طبعًا لل VIP بس".
واستمرت ريم في سرد الحكاية فقالت "وطبعًا أنا شايفه إعلاناتهم في كل حته عن الفرصة الذهبية لكمبوند- وهمى- وارخص من كل زيه بكتير. روحت الساعة 6 الصبح. لقيت زحمة جدا. وقالولى لازم أسلم بطاقتى لواحد في آخر الزحمة دى علشان يدينى رقم. أنا اتخضيت من المنظر ولكن بعد عناء طويل الحمدلله سلمت بطاقتى ووقفت مستنية الرقم لحد الساعة 8:30. وكان رقمى 606!!"
وأضافت ريم مهنا "المهم استنينا أن الشركة تفتح وندخل. ولك أن تتخيل الأعداد واقفه من قبل 6 في الشارع. فبدأت الناس تقعد على الرصيف وعلى الأرض من التعب. والمنظر كان صعب أوى. وقالولنا استنوا دوركم. "طيب الرقم اللي على الدعوة ده أيه؟" مش هندخل بيه.. لاء ده كود. أنت هتدخل بالرقم اللي أخدته لما سلمت البطاقة. وفضلوا كل شوية استنوا قربنا، ما تمشوش، طيب نروح مكان نشرب قهوة لاء لازم تستنوا هنا"
وتابعت ريم حكايتها "المهم الساعة 12:30.. شايفين الطابور الجديد ده؟؟ اقفه فيه بقى لإن مش هناخد بالارقام ال اخدتوها!!!، أنا- أيه؟؟ انتى مش شايفه الناس بقوا كتير أزاى وأنا جاية من 6.. عايزانى اقف ورا كل الآلاف اللي جت في الست ساعات ال فاتت؟!!!، آه اصل الرقام دى طلعت ولا حاجة.. ولازم تقفوا في الطابور".
وبعد 7 ساعات من الانتظار قالت ريم مهنا "وبعدين الساعة واحدة قالوا والله في 3 آلاف واحد دخلوا الشركة وزحموا المكان. ومش هينفع كده نشتغل. ادفعوا 100 ألف حجز. واحنا هنبقى نكلمكم بعدين!!!".
لكن هناك تجربة سابقة سردتها ريم مهنا فقالت "اللطيف في الموضوع. إن واحد قريبى لما عرف اللي حصل قاللى إنه راح افتتاح مشروع Chill out Park بتاعهم. وبعد انتظار دخلوا. وقالو له أدفع 100 ألف جنيه علشان تحجز الشقة. وأحنا هنكلمك علشان تيجى تمضى العقد. ومشى وفضل يجرى وراهم سنة كاملة علشان يمضى العقد وهمه بيأجلوا. لحد بعد سنة حددوله معاد. راح قالوله الشقة اللي انت حاجزها كانت بـ 900 ألف بقت بمليون و400 ألف. طبعًا مصدقش. قالوهم بس هوا حاجز من السنة اللي فاتت على أساس 900 ألف قالوله بما معناه اخبط راسك في الحيط. ولو مش عايز تدفع النص مليون الزيادة هنردلك فلوسك. يعنى همه لموا فلوس شغلوها ورجعوها للناس زى ما هيه بعد سنة. وغاللو الوحدات فوق 50%. وضيعوا على الناس فرصة شرا في أماكن تانية".
وقالت ريم عن التزاحم "اللطيف إن بعد كده معرفوش يبيعوا باقى الكمبوند وبدءوا يدوا تسهيلات تقسيط على 10 سنين ولسه مش عارفين يبيعوا. فجاتلهم فكرة التسويق لنفسهم عن طريق عمل زحمة لإثبات الإقبال. اللطيف برددو في الموضوع أن كانوا بيعلنوا أن السعر 7000 المتر. بس قالولنا أنه 8500 المتر. ده بجانب أن في 90 آلاف جنيه مكان في الجراج لكل عربية تجيبها (يعنى 90 كمان لعربية مراتك) وفى 50 ألف اشتراك إجبارى في النادي.. يعنى 230 ألف زيادة على سعر الوحدة غير طبعًا الصيانة!!!"
