محمود العدوي يكتب: «السجن بيخاف من المساجين»
مهما تزود في الزنازين
السجن بيخاف من المساجين
الضي عدا من الطاقة
صحاب في سكة ورفاقة
ضحكة وجعنا المشتاقة
مرسومة جوه سواد العين
مهما تزود في الزنازين
السجن بيخاف م المساجين
شهدي عطية كان البادي
دمه على الأرض ينادي
لونت علمك يا بلادي
بالأحمر اللي فوق اللونين
مهما تزود في الزنازين
السجن بيخاف م المساجين
شاويشك اللي واقف بره
خايف من الكلمة الحرة
لا كدبته حاشت مرة
الكلمة تخرج للملايين
مهما تزود في الزنازين
السجن بيخاف من المساجين
