قصة مؤثرة تكشف أمانة عامل في محطة تموين وقود

روى أحد أصحاب السيارات عبر جروب سيارات على موقع التواصل الاجتماعي «فيس بوك» واقعة غريبة، قليلا ما تحدث في مصر، وذلك عندما وجد كبير أخصائيين بدرجة مدير عام في جامعة القاهرة يعمل في محطة وقود!!!.

وقال صاحب السيارة: «أنا داخل أغير الزيت، العامل قالي افتح الكبوت وبدأ يشوف الزيت وقال ثانية واحدة وراح لمديره ورجع وسألني: عملت كام بالزيت ده؟، قلتله 3000 كيلو، سألني: كنت حاطط زيت إيه؟، قلتله: موبيل 3000، قالي: الزيت لسه جديد وممكن تمشي عليه ألف كيلو كمان».

وأضاف: «المهم بيقفل الكبوت ولقيته قالي القربة بتاعت الميه ديه مش هاتكمل مشوار معاك، قلتله إزاي؟، قالي بص كده لاقيت القربة مشروخة  وفيه لون أخضر نحون الشرخ وفيه تسريب ميه، قلتله انتوا بتبيعوا الحاجات دي هنا؟، قالي لأ للأسف بس كمان ديه لازم تجيبها أصلي وممكن تلاقيها غالية، قلت له طيب تنصح بإيه؟ قالي ادخل الماركت واشتري لزق ايبوكسي بـ12 جنيه بس هات النوع اللي فيه 3 عبوات الإيبوكسي والمصلب وأنبوبة تالتة مكتوب عليها الصاروخ».

وتابع: «وفعلا عملت كده، راح جايب سيجارة من على الأرض وخلع الفلتر بتاعها وحطها على الشرخ وحط عليها الأمير وبعد كده حط الإيبوكسي وسابها تنشف لمدة خمس دقايق لغاية مابقت زي الحديد، وقالي لازم نغير مية الردياتير ومتقلقش هي بـ25 جنيه بس، قلتله ماشي».

واستكمل صاحب السيارة القصة المؤثرة قائلًا: «وهو شغال قولت له هو كل اللي في البنزينه بيراعوا ربنا في تصرفاتهم زيك ولا أنت بس، قالي مدير البنزينة راجل عارف ربنا ومابيسمحش بأي حاجة غلط، قلتله ممكن أصورك وانشر اللي أنت عملته معايا قالي لا مش هاينفع، ومن غير ما اسأله ليه، لاقيته بيطلع لي الرقم القومي والمهنة كبير أخصائيين بدرجة مدير عام بجامعة القاهرة بس هو على المعاش، بقيت مش عارف أديله بقشيش ولا أسيبله العربية وأمشي ولا أعمل إيه بس».