رئيس التحرير
عصام كامل

(بحبّك).. والله بحبّك..!

أحمد الغرباوى
أحمد الغرباوى

روحى بِتصحى عليها
تطير على زهرة
بِتدّور..
عايزة تِلفّها بــ
عِشقك..!

أسأل مَلاك
يناجينى كُلّ يوم في
شَكلك..!
بسّ مِش عارف ليه
دايماَ مِخبّى عنّى
حِسّك..!
وعن وردة نادرة
تِخلّى ربيع دايم
عِشّك..!
مِتندّى أوراقها
بعرق شارب من
جِلدك..!
لمّا فِ الشِتا
يِغطّوا صُوبتها بتوب
جينزك..!
يِسّحب زخّات مطر
بيرقص على سفح
خدّى..
مَروىّ بستانها
بِميّ مِتشطّف بيه
وَجهك..!
ولمّا ينفخ الروح
ويتولد قلبى
عِرفتك..!
يعاتبنى حُبّى
ليه كُلّ دَا
سَجنتك..!
يلوم عُمرى ليه
وأنا شُفت حُبّى
إلا يوم ما
شُوفتك..!
ولمّا غاب عنّا
جسدك..
وأخدت روحى في
أجازتك..
يأس الروض
ولم يعرف أحد
ليه كُلّى بيبكى
في عَزا
فقدك..!
وردة تقول لفُلّة:
(لسّه مش فاهمه
برضك)..!
وتردّ عليها
ياسمينة طَلّه في
يانعك..
يا حبيبى..
أصل كُلّ الزهر
بيشمّ ريحته من
ريحتك..!
وكُلّ الورد فيه
شىء من
عِطرك..
اللى هوّا
كُل شىء في
حُبّك..
لكن الزهرة اللى
بدوّر عليها
لأجلك..
هِيّا كلمة جوّاية
مدفونة من يوم
وِلادتك..!
إتولد قلبى قبلك
وفِضلت مِستنيّة
قلبك..!
وييجى يوم و
أقابلك..
يا ما قلوب كتيرة
عايزاه ومش شايفة
حُبّك..!
طيّب ما أنا كَمان
ما عِرفتش إنّه
مِنتظرك..
إلا لمّا شَبكت
روحى فِ صنارة
بَسمك..!
إعذرها حبيبى
زىّ ما فِ وجدى
عَذرتك..؟
وردة واحدة
ما فِ غيرها خلقها
ربّك..
على ورقها منقوش
أربعة حروف بــ
تقولك..
(بحبّك)..!

مكان النقط المنوّرة
في أوّل
قصيدتك..
وبرفق يهمس بيها
حنينى لجبين
صورتك..
وأكتر وأكتر بأرميها
في طريق
حقيقتك..
قلب من لحم ودم
يخاف موته في
لمسك..
ويتعذّب لو سِيبته
واللا حتى بعدته
عنك..
واللا حتى على جنب
رميته بضربة
رِجلك..!
ما إنتَ دايمًا
واخد في
وشّك..
وبتجرى شايل
ورقك..
وقلبك الخجول فارس
مِستنّى في
ضِلّك..
وحُبّه سيف
شايله فِ جراب
جيبتك..
وبعينه عليك ينادى
وتِجرى أنفاسى
توصلك..
وفى دلال ودّك
تقرّب من
ودنك..
علشان خاطرى
شويّة بسّ على
مِهلك..!
روحى بتترجّى
من روحى
سَلامتك..؟
والله خايف وبخاف
وقوعك في
جريك..
ويتأجّل شوق روحى
اللى وراك وقُدّامك و
جَنبك..
يا ترى لمّا
تشوف النينى اللى
شايلك..
ممكن تُسكن روحى
ومن لحمى تاخدنى
أغلى كلمة في
مشاعرك..
هيّا.. كلمة
بحبّك..!

بحبّك..!
يتبلّ بيها قلب
حَبّ بجد قبل
شفايفك..!
وعليها ترقص الروح
ويغنيها العالم ليل
زفَّك..!
والله.. والله
بَحبّك..!


*****
شعر: أحمد الغرباوى

Advertisements
الجريدة الرسمية