رضوى إبراهيم تكتب.. رسالة لكل متطفل

 المتطفل ده غالبًا يا إما بيكون شديد الحب "وده نادرًا"، يا إما شديد الكرة والحسد والحقد للشخص المتطفل عليه "ودول الغالبية العظمى"!! تلاقي أشخاص حاشرين نفسهم في كل حاجة في حياتك .. إنت أكلت إيه النهارده؟! خرجت فين؟! عنستي! القطر فاتك! اتجوزتي ولا متجوزتيش؟ خلفتي ولا لسة مخلفتيش؟ إيه سبب طلاقك؟ متخانق مع مراتك ليه؟ متخانقة مع جوزك ليه؟ طيب إيه اللي بيحصل في بيتك؟ في شغلك؟! في حياتك؟!

ودي النوعية الأولى من المتطفلين .. ومبيكنش غرضهم حب .. إطلاقًا .. عايزين يشمتوا! أو يلاقوا حاجه يتكلموا فيها! وغالبًا دول مش بيتسمُّوا "متطفلين" بس! خالص .. بيُطلق عليهم كمان لفظ "اللباخين"، وتعني كلمة "لباخين" باللغة المصرية الشخص الذي لديه القدرة على توقيع وإثاره الفتن في بلد بأكملها .. والنوع ده عامل زي الوباء، منتشر انتشار غير عادي في حياتنا .. لا بينفع معاه رش ولا بودرة ولا شبشب .. لكن ينفع معاه الاجتناب .. وإنك تحرجه ومتعرَّفهوش أي حاجه عنك؛ لأنك بالطريقة دي انت بتموِّته .. علشان مبيقدرش يوصل لغرضه! وبيصبح لا على حامي ولا على بارد .. النوعية دي رخمة وبتجيب مشكلات، بس مشكلاتها أقل بكتير من النوع التاني اللي هنتكلم عنه.. كبير النوع الأول في الكلام بيكون الشماتة ونقل الكلام من شخص لشخص، وتناول سيرة الناس في كل المجالس ..

 ومش بس كده، دول بيدوَّروا في تفاصيل تفاصيل حياتك .. قرايبك .. إخواتك .. أصحابك .. نقط قوتك .. نقط ضعفك .. يمكن يطلع بمعلومة .. دايمًا عايز يعيشك داخل نظرية المؤامرة .. وإنه حامي الحمى ليك، وهو المنقذ الوحيد ليك .. ممكن يوصَّلك لمرحلة إنك بتفقد الثقة في كل اللي حواليك .. ما بتكونش عارف وقتها مين بيحبك ومين بيكرهك .. دا ممكن يشككك حتى في نفسك .. ومبيوصلش المتطفل الخفي للتشكيك ونظرية المؤامره فقط .. لا .. دا ممكن وغالبًا بتوصل للأذية الفعلية، ما هو عارف عنك كل حاجة.

 المتطفل من النوعية دي بيكون حاقد، والحقد بيولد الغل .. والمتطفل لو بيتمتع بذكاء حاد بيعمل نفسه حبيبك وبيساعدك وخايف عليك .. وبيجمع من خلالك ومن خلال الناس اللي حواليك أكبر كم من المعلومات عنك .. وتلاقي هوب ضربة جايَّالك مش عارف دي جتلك منين وفين وإزاي .. ويظهر هو علشان يطبطب ويعمل حبيبك!! وفي نفس الوقت هو بيكون من جواه سعادة غير عادية، وهو شايفك عامل زي الفرخة المدبوحة .. النوع ده بقى صعب القضاء عليه ولكن ممكن ناخد حرصنا بشوية حاجات:

 * أسرارك تبقى جواك، محدش هيعرف يحافظ على أسرارك غير نفسك، لو مقدرتش يبقى متلومش غير نفسك..

 * تدعي ربنا دايمًا إنه يبعد عنك ولاد الحرام وأي أذي ممكن يمسك.

 فيه رسالة عايزه أوجِّهها لكل شخص حصل معاه كدا:

 من فضلك، إوعى تقع وتشمِّت فيك حد .. إوعى توصل إنك تحس بالوحدة وبخذلانك من الناس .. إوعى تسمح لحد أنه يخلق جواك كلاكيع. 

 وفي الآخر نفسي أوجه رساله لكل متطفل:

 من فضلك أيها المتطفل الفضولي الحقودي، متحاولش تخلي عقدك تسيطر عليك، لو مش هتقدر تساعد حد يبقى بلاش تكون سبب في أذيته .. لو إنت مش عارف تكون سعيد بلاش تكون سبب في تعاسة حد .. واعرف إن الحياة "داين تدان".