بالفيديو.. تراجع الإقبال على الدواجن بعد انتشار سرطان الطيور

أثارت واقعة بيع دواجن مسرطنة بالدقهلية بسرطان الطيور "الليكوزس" فزع المواطنين، وتباينت ردود أفعالهم بين ممتنع عن الشراء وبين من سلم أمره إلى الله وواصل شراء الدواجن رغم التحذيرات، وسط أعتماد غالبية التجار على الثقة المتبادلة بينهم وبين الزبائن.

رصدت عدسة "فيتو" ردود أفعال المواطنين وبائعي الدواجن على شائعة وصول دواجن الدقهلية المسرطنة إلى أسواق القاهرة، كما بالتقرير التالي:

وقالت نها السيد "كل حاجة بيقولوا فيها سرطانات مش هناكل؟ ! حتى الخضار فيه كيماويات والسمك بيقولوا مات في النيل..غصب عننا هناكل واللي مكتوبلنا هنشوفه".

وقال عم مجدى، صاحب محل دواجن: "سرطان الدواجن أثر عليا ما فيش بيع ولا شراء، الناس بتيجي تشتري الفراخ وخايفة.. أنا بطمنهم إن الفراخ سليمة وأنا باكل منها، وموضوع سرطان الفراخ ظهر من 3 شهور، وباكل في بيتي فراخ ما قطعتهاش ".

فيما قالت أم حسن، بائعة دواجن بعين شمس: "لما تكون الفرخة سمرا أو زرقا تخافي منها، الفرخة الكمشانة في نفسها بتبقي مريضة".

وأضافت: "لو الفراخ فيها أمراض أو سرطانات أنا أول واحدة هتأذي منها لأن أنا اللي بنضفها ويعتبر عايشة معاهم طول اليوم".

وقال عم فتحي، صاحب محل دواجن بسوق المطرية: "المفروض يكشفوا على الكتاكيت الأول وهي داخلة البلد لو سليمة خلاص، المشكلة في الكتاكيت اللي بتدخل البلد وما نعرفش عنها حاجة"، وتابع: "الناس بتيجي تاخد ربع كيلو بانيه ونص كيلو وراك وبتشتري رجول فراخ تطبخ عليها من قلة الفلوس، الناس تعبانة".