شوية ناس كدة على الماشي
في أوقات كتير بتمر علينا في حياتنا، صعبة وسهلة وحلوة ووحشة.. الأوقات دي بتأثر فينا بمزاجنا أو غصب عننا، وبيكون ليها نتيجة واضحة في الأمور الحياتية.
إللي بيهون الأوقات البايخة دي بعد ربنا، هما شوية ناس أكيد كان ليهم دور كبير سواء بالتشجيع أو حتى باللامؤاخذة النفاق، فيه إللي كان موجود بجد، وإللي كان مجرد بيثبت حضور مش أكتر، وإللي استنى معاك لحد النهاية، وإللي نزل في أول محطة.
كل واحد من دول ليه علامة، ليه تفصيلة مُعينة جواك مستحيل تتنسي، حتى لو أنتم مش مع بعض دلوقتي، لكن أيام زمان معلّمة لحد دلوقتي.
الناس إللي إدت لك كل شيء من باب راحتك، والناس إللي داست عليك في عز راحتك، الناس إللي كانوا واقفين بيتفرجوا، وإللي كانوا معاك في كل لحظة، الناس إللي قالوا عليك مش هتقدر ولما قدرت قالوا كننا متأكدين!
إللي ضحكنا معاهم وهما بكُّونا، إللي فرحناهم وهما...!
امسك في كل إللي حبك من قلبه، إللي حبك بجد مش مجرد كلام، امسك في إللي ضحى بحاجات مهمة علشانك، امسك في إللي شاف عيوبك وحاول يصلحها معاك، امسك في إللي بيسأل عليك مع أنك أنت مش بتسأل، امسك في إللي عارف عنك بلاويك وكل حاجة وحشة ومُصر هو إللي يمسك فيك، خُد بالك من إللي حبك وفي الآخر ارتبط بيك وماسابكش وسط السكة، حلوين أوي الناس إللي أنت مش مضطر تثبت لهم حاجة علشان هما مؤمنين بيك وبمبادئك، امسك في إللي حاسس بيك مش حاسس أنه كتير عليك.
