«أنجيلينا» حلم بعيد عليك

من أكبر المشاكل اللي الإنسان بيحط فيها نفسه من غير ما ياخد باله هو أنه بينسى أنه يشوف هل الهدف بتاعه متوفر فيه سمة الـ ”القابلية للتحقق - Achievable “ ولا لا؟؟ والسمة دي لو مش موجودة في الهدف بيبقى مستحيل على الشخص أنه يحقق النجاح اللي هو عاوزه في هدفه ولا بعد 100 سنة.

طب أنا أعرف السمة دي موجودة في هدفي ولا لا إزاي ؟؟

ببساطة مثلًا مستحيل تبقى أنت إمكانياتك العقلية والجسدية والجمالية مش قد كده وتفتكر أن أنجيلينا جولي ممكن تسيب براد بيت علشانك ؛ لا صحيح ساعتها بجد مش بعيد تكون اتجننت.

مش عيب طبعًا تخلي سقف طموحك عالي جدًا ويبقى عندك أحلام كبيرة نفسك تحققها... لكن لو أحلامك دي مش واقعية بيبقى الأفضل تبعد عنها لحد ما تكون مؤهل ليها علشان متضعيش مجهود وتعب على الفاضي.

فيه أحلام كتير من الأوقات بتضيع أصحابها لأن كل ما الأمل بان مستحيل بتبقى العرضة للفشل أكبر ؛ فليه من البداية تخوض تجربة وأنت عارف مصيرها ؟!

متحكمش على نجاحك بالموت من قبل ما تبدأ فيه بسبب أن طموحك أكبر من إمكانياتك وقدراتك اللي تأهلك لبعض الأهداف اللي نفسك فيها.

مش معنى كده إني بقولك متخليش سقف طموحك عالي، لكن خلي عندك أسبقيات في الأهداف الأهم ثم المهم، يعني ابدأ بهدف ممكن تحققه وتحقق فيه نجاح بعدين ابدأ في هدف محتاج قدرات أكبر وتفرغ أكتر علشان يتحقق ويشوف النور.
Twitter: @PaulaWagih