قصيدة «إنسي خلاص»
مش هاتكلم تانى عليكى
ولا هاكتب ف عيونك شعر
من دلوقتى أنا هابعد عنك
وأقسى عليكى
زى ما خدتى منى العمر
أنا طول عمري باكتب عنك
و اوصف نهرك
والمس شمسك
و ابنى قصورى تحت الضى
ما أنا ف عيونك مالياش زى
علشان دايما عاشقة كلامك
حتى أوهامك
من جسمى بانياها عقود
ويعزف نهرك فيا العود
والبس من توبك فستان
أسود خالص زى كلامك
زى أحلامك
و اتعقدت من وسط حشود
ليه خنتينى بعد ما حسيت
منك إني خلاص حبيت
ليه سبتينى لما اتهد
عليّ البيت
ليه علشانك
أنا باتهان
ولا اتحبيت
و معاكى ما عرفتش فرح
ولا اتهنيت
ليه يا حببتى كل همومى
بتجرى معاكى
وأنا ف الأخر ليه اتهديت ؟
انسي خلاص مش راح اكتب
سحر عيونك
شطرة شعر
من دلوقتى هانسى قساوتك
و أنسى ملامحك
حتى ولادك هابعد عنهم
و كأني معرفتش حد
علشان انتى خنتى العهد
و كسرتينى
آه بعتينى
وبحراسك
كرباج كان على جسمى
بينزل ولا هموش
يضرب على جلدى
و آهاتى بتنزف
أحزان
و أنا يا حبيبتى كتير باستحمل
علشان نفسى أشوفك
زى ما شفتى كل ولادك
ضحوا عشانك
و انتى ولا همك حد
وليه حراسك
دائما
بانيين بأيديهم على قبرى
أكبر سد
و أنا باتعذب لأجل عيونك
لأجل ما امشى رافعه الرأس
كلمة قالتها في وقت الجد
وأنا دلوقتى
هامشى طريقى بخيبة اليأس
وأدفن نفسى
واتكفن بعصاية
الحبس
ولو فيّ عروق بيحبوكى
أنا عن نفسى
مش هاكتب تانى عليكى
ولا هاتمنى إني أشوفك
وأنا مش عودك
علشان قلبي
يعزف دم
