"الناظر مات" قصيدة لمحمد عبد الله توفيق
الناظر مات والمدرسة م النهارده من غير ناظر
والأباصيري والزناتي ماحدش على ولادهم قادر
فاتنا وراح إللي كان مليان حنان وخفة دم
كوميدي وتراجيدي وبكل تفصيلة بيهتم
مثل ألف شخصية وشخصية خفيف الظل
مالوش مثيل فنان في الفن مالهوش حل
طيب حنون وعطوف على الخلق دايما بيعطف
اتربى على أيده ألوف وكأنه بالكمانجة بيعزف
أخلاق وكله أدب وكله مودة وحب
أمثال وفيه تنضرب وكرمه كان م القلب
إنسان وكان طول عمره إنسان جميل حبوب
موهوب قوي في فنه ومالوش أي عيوب
راجل وعاش أيامه وفي كل حتة يسد
علشان في كل كلامه راجل يا خلق بجد
لايق في كل أدواره مرسوم عليه الدور
والمخرج إللي بيختاره عارف أبو منصور
منصور ده كان ابنه في الفصل من الفاشلين
هو ومرسي وبهجت وشلة المشاغبين
عايزين بقى ناظر قادر يا ناس وحكيم
زي حسن مصطفى ويكون فارس وعظيم
يكون فارس وعظيم
