«بص العصفورة»
بص العصفورة
بص براحتك بره الصورة
تلقى شجر عمال يتمرجح
بص وركز في العصفورة
وابعد عن عقلك واتفسح
كان يا ما كان
كان فيه بنت بتلعب أوله
جوه حواري القلب الحلوة
عدت بيت واتنين بسهولة
بس خسارة وقعت سهوة
جت رجليها فوق الخط
وقعت بيها راحت مكسورة
علشان بصت بره الصورة
كان يا ما كان
كان فيه شاب وياما شباب
راح يتعلم جوه الجامعة
شايل حلمه في حضن كتاب
قتلوه وقالوا كان من رابعة
علشان فكر مرة يعارض
وكتب رأيه على السبورة
شافوا الأمن وصوره صورة
كان يا ما كان
كان فيه شعب وياما شعوب
عاشت جوه ضلامها ونامت
شالت بدل الذنب ذنوب
بس في لحظة فائت قامت
واما اتمنت ترسم بكرة
حاوطوها بكلاب مسعورة
ورموها كده بره الصورة
كان ياما كان
كنا وكنتم جوه ميدان
ورصيف فوقه بشر ألوان
وهتاف عالي كأنه أدان
وياه صوت غنوة لحليم
بتقول
كلنا كده عايزين صورة
بص براحتك بره الصورة
جوه الصورة
جنب الصورة
بس ياريت وانت بتتفرج
اوعى تخلي عينيك مكسورة
