صايم عن الفرحة
بنكهة خوف مالوش لازمة
بتتعكز على حزنك
وترسم للحياة صورة
تشبهها بميت أزمة
على مليون ألم صامت
وحالف أد ميت حلفان
تعيش صايم عن الفرحة
مغمض كل عين جواك
سواد الليل بيحلالك
وبيزود في موالك عن الأحزان
كمان دمعة
وتزعل لو تشوف نجمة قصاد عينك
بتتمايل على إخواتها
وبتوشوش ضلام الليل بكام كلمة
بتتنرفز من الضحكة
وترسم بين حواجبك سور من العتمة
وتتخاصم مع الألوان
عشان فاتحة
وتعشق كل لون غامق يعيش جواك
ومتجسد في دور ميت
لكن عايش ما بين أحياء
