«اللبان» وزيادة نسبة التحرش بالفتيات

قبل ما نتكلم عن التحرش نفسه.. لازم نعرف أنواعه الأول..

في نوعين للتحرش.
_ ( تحرش لفظى ).. هو إيذاء الشخص اللى أدامى بكلمة جارحة أو لفظ خارج
_ ( تحرش جنسى ).. دا بقى المصيبة الكبيرة اللى هو ملامسة الجسم !!!

تعالى نمسك الموضوع من البداية خالص. من أول البيت
ممكن تلاقى الطفل دلوقتى يطلع يلاقى أبوه بيشتم أمه بأقذر الشتايم والتعبيرات، ممكن كمان تلاقى الأسرة كلها بتتفرج على فيلم وجت لقطة مش كويسة، يقوم الأب عامل فيها عبده العبيط ومايقلبش ويسيب عياله يتفرجوا عادى عالمناظر دى، دا بالنسبة للبيت.

تعالى نبص للمدارس بقى.. هتلاقى المدرس برضو ممكن يشتم الطالب بشتيمة قذرة.. عادى جدا! ممكن تلاقى مدرسة فـى مدرسة إعدادى رايحة شغلها بلبس سواريه وحاطة أحمر وأخضر!.. وفاكرة أن الطلبة دى أطفال أحباب الله وملايكة! دا غير درس العلوم بتاع 3 أعدادى اللى خلى مخ الطالب يستقبل المعلومة على أنها معلومة جنسية قبل ما يستقبلها على أنها معلومة ثقافية من باب المعرفة والتعلم!.

دا بالنسبة لفئة معينة من المتحرشين اللى هما الأطفال والشباب من سن ابتدائى لحد سن ثانوى.. في فئة تانية بقى من المتحرشين.. هما الناس اللى فوق سن الــ 25 الناس اللى هي ناضجة بس زى ما تقول كدة اتعلم التحرش على كبر !

طبعا ممكن الواحد من دول يكون مر بالمراحل اللى اتكلمنا عليها بس مارس التحرش وهو كبير.. طب لو هو ماكانش مر بالمراحل دى يبقى إيه السبب ؟؟

خد عندك يا سيدى..

أولا.. صعوبة الجواز فى الزمن دا وطبعا كلنا عارفين الأسباب.
ثانيا بقى ودا الأهم والأساسى فـى الموضوع كله (( الأفلام الإباحية )) !!

روح دلوقتى امسك موبايل أي شاب أو قلب فى جهاز الكمبيوتر بتاعه هتلاقى عليه صورة إباحية أو فيلم إباحى.. إلا من رحم ربى !!
طبعا بعد ما الواحد يتفرج على الحاجات دى.. أكيد الشهوة هي إلى هتتكلم وبالتالى هيبقى عايز يشبعها تحت أي ظرف.

تعالوا بقى نشوف البنات هي كمان حكايتهم إيه.. تلاقى البنت من دول مجرد ما يبان عليها أعراض الأنوثة تجرى على محال الهدوم وتنقى أضيق لبس وتبقى ماشية فـى الشارع نفسها تتعاكس علشان تحس بنفسها حتى العبايات اللى كنا بننصح بلبسها عشان حاجة فضفاضة ومش بتفسر الجسم.. والله العظيم بقت أضيق من اللبس العادى! كمان حاجات ممكن البنت تكون بتعملها ومش واخدة بالها أن الحاجات دى سبب فى أن شخص يتحرش بيها زي طريقة كلامها.. ونظراتها وهى ماشية.. وطريقة مشيتها، كل دى حاجات بتساعد على التحرش.

إحنا بنشوف بنات بتاكل اللبان في الشارع زى ما تكون بتعرف الناس أن فـى بوقها لبانة وتفضل تطلع بيها أصوات غريبة! طبعا انتى هتقولى عليا أهبل دلوقتى.. لبان إيه وبتاع إيه اللى بيقولوا ده.. أحب أقولك إن فـى علم النفس الفسيولوجى بيسموا أكل البنت للبانة بالطريقة دى.. (( المناداة الجنسية الصريحة للرجل ))! والكلام دا موثق فـى كتب كتير. 

طبعا بعد كل الكلام ده إحنا بقينا أدام مجتمع مقسوم نصين.. شباب عنده كبت !!.. وبنات مستفزة !!

يعنى مافيش بنت تيجى تقولى الشباب هما اللى غلط.. ومافيش شاب ييجى يقولى البنات هما اللى غلط.. لأ في حاجة اسمها سبب وفى حاجة اسمها فعل لازم يتقابل برد الفعل، لكن لو نسبة الغلط 100 %... أنا بحمل الشباب منها 60 % أنت دلوقتى لو حضرتك صايم وفــى عز الحر. روحت أنا جايب إزازة ماية ساقعة مشبرة وزوقتها كدة وحطتها أدامك.. روحت أنت شربت منها وفطرت! أنت اللى غلطان ولا الإزازة؟!!

وبعد كل دا الطرفين فـى الآخر هما للأسف ضحية مجتمع متخلف بيقلد الغرب تقليد أعمى من غير ما يدرك العواقب المترتبة على التقليد دا !!

نصيحة لكل أب وأم.. ربى عيالك تربية صح وانزل لمستواهم وقرب منهم وعرفهم يعنى إيه ثقافة جنسية بمعناها الصح اللى الدين قال عليه.

نصيحة لكل شاب.. ماتستسلمش للحرب اللى جايالك أنت مخصوص من الغرب.. اتحكم فـى شهواتك بالصوم والصلاة.. وغض بصرك.. وأفعل ما شئت كما تدين تدان.

نصيحة لكل بنت.. اتقى الله في لبسك ومظهرك وماتقوليش هما اللى يحترموا نفسهم.. لأن طول ماانتى باين عليكى آثار العفة عمر ما حد هيقرب منك.

وانت مالكش دعوة بغيرك وابدأ أنت صلح من نفسك وصلح من أصحابك وقرايبك وجيرانك وكل اللى حواليك... لو كل واحد عمل كده بإذن الله هنبقى مجتمع راقى.. مافيش حاجة صعبة ابدأ طول ما إحنا بناخد خطوة وبنجدد النية.