لغز محافظ الإسكندرية «الكيوت»
محافظ الإسكندرية الجديد «الروش» اللى أكبر إنجازاته اللى قدمها للناس هى، أنه رياضى، وصوره وهو بيسوق العجل وفى حمام السباحة ملت الجرائد، بياخد مراته معاه تحضر كل لقاءاته الرسمية مع الوزراء والمسؤولين !!
آه والله زمبؤلكوا كده !
تقريبا المحافظ الكيوت فاكر أنه رايح النادى زى ما هو متعود، وواخد المدام وقاعدين يتناقشوا فى مشاكل مصر مع الفريندز، وبعدها يلفوا التراك وياخدوا درينك على البيسين ! وناسي أنه مسؤول ودي لقاءات رسمية!
وبتقعد حضرتها تناقش المسؤولين، ووزيرة البيئة زعلانة أوى هى ونائبة المحافظ لأن مرات المحافظ مالهاش صفة رسمية وخرجوا يشتكوا !
يا ريت سيادته المرة الجاية يجيب معاه الأولاد، والوزراء يجيبوا المدام والأولاد واللقاء يبقي فى نادى سبورتنج أو فى كافية على البحر وتبقي لقاءات وزارية عائلية والمدامات يتكلموا براحتهم والأولاد يلعبوا ويتبسطوا أحسن من كتمة المكاتب.
