عبده الزراع يهدي «وردة في قلب الوطن» إلى شيماء الصباغ
وردة في قلبك يا مصر
ووردة في عيونك
"شيماء" يا شايلة الوطن..
ف الننى وجفونك
والغدر بيخونك..
وانت وردة ندية غصنها مياس
طالعة قمر بينور التحرير
بيناغى فينا الحب والنشوة والإحساس
لحظة برودة بتمس قلبك مس
بتدورى ع الدفا وسط الميدان
وتدغدغى الأوجاع
نعناع هدوئك بلسم الأرواح
وانت النسيم طازة..
وبسمتك جنة
وبتعشقى الحرية
والورد ف الفازة
وكفوفك الممدودة بالفرح والحنة
وضحكتك يا شقية
بترن في ودنا
بتصحى فينا السكات
وضميرنا لو كان مات
طيفك يذكرنا
"شيماء" يا عصفورة
وطايرة ف الجنة.
