مشكلة شاب مش عاوز يصلي

كتير من الشباب والبنات مش بيصلى أو بيصلى وقت الحاجة بس زى أيام الامتحانات كدة للأسف وبينسوا ربنا باقي السنة !!

أنت / أنتِ بتصلى الفروض الخمسة؟، لو بتصليهم اتمنى من الله انك تداوم على الفريضة دى، لو مش بتصلى بقى أو بتصلى بس مش منتظم.. طب تعالى نتكلم شوية..

من وانت أد كدة وانت بتسمع نصايح عن الصلاة من أيام حضانة وابتدائى وتلاقى أبوك وأمك يقولولك صلِ عشان ربنا يكرمك وتلاقى الأستاذ في الفصل يقولك صل عشان تبقى ناجح ف الدراسة ولو مصلتش هتخش النار، وياويلك من عذاب القبر دا غير عذاب الآخرة.

أنا مليش دعوة بقى بكل الكلام اللى انت سمعته دا أنا هتكلم معاك بوجهة نظر تانية خالص وجديدة شوية، أنت عشان تعمل أي حاجة فـ الدنيا وتستفاد منها وتستمتع بيها محتاج إيه؟.

محتاج حاجتين..

1ـ معلومات عن الحاجة دى
2 ــ وجهة نظرك فـ الحاجة دى

لو الحاجتين دول بيمثلوا نسبة 100 % يبقى المعلومات هتمثل 20 % بس !! تخيل ! ووجهة نظرك انت تجاه الحاجة دى بتمثل 80 % !!.

أصلا انت شايف الصلاة إزاي؟!، في ناس شيفاها مجرد حركات ميكانيكية وروتينية.. كل اللى عليه يفضل طالع نازل ويركع ويسجد بس!، وفى ناس شيفاها مجرد أداء واجب.. وفى ناس شيفاها هم مش بعرف أنام إلا لما أخلص منه.. وفى ناس شيفاها اتقاء من غضب الله فـ بتروح تصلى..

أنت بقى شايفها ازاى ؟؟

استنى قبل ما تجاوب على سؤالى.. انت من زمان برضو بتسمع الكلمة ده، «الصلاة عماد الدين».. صح؟ طب يعنى إيه الصلاة عماد الدين أصلاااا ؟؟!!

تخيل دلوقتى أنا وأنت صحاب أوى من زمان وأنا جيت أزورك فـ بيتك رحت كاسر لمبة !!! هتزعل منى شوية لكن بعد كدة هنتصالح، وجيت مرة تانية رحت كاسر مراية !! هنتخانق شوية برضو بس هنتصالح فـ الآخر، وجيت مرة كمان وقعت الفاظة اتكسرت !!! هنمسك ف بعض بس هنتصالح برضو فــ الآخر، لكن تعالى كده تخيل جيتلك البيت وفضلت اكسر فـ العواميد الأساسية بتاعت البيت اللى هي شايلة البيت أصلا !، أنت مش بعيد تموتنى فيها عشان أنا كدة خلاص بوصلك لنهايتك.
هي دى الصلاة بالظبط زى عمود البيت الأساسى.. لو اتهد ووقع هتقع انت معاه وعلاقتك مع ربنا هتنتهى وتدمر!.

نرجع للسؤال اللى سألتهولك فوق بقى.. أنت شايف الصلاة إزاى؟، شايفها مجرد برواز أو مراية اتكسرت؟ ولا شايفها عمود من عمدان البيت الأساسية ؟!

وجهة نظرك للصلاة هي اللى هتحدد قرارك في أنك تصلى أو لأ..

عايز كمان أقولك حاجة.. الصلاة فريضة على كل مسلم ومسلمة، يعنى لازم تصلى ومفيش أي حاجة تمنع الصلاة خالص غير حاجتين (امرأة حائض أو نفساء).

أنا كدة جبتلك من الآخر يعنى أنت كــشاب أو راجل ملكش أي عذر أنك متصليش مادام فيك الروح والدم بيجرى فيك لازم تصلى.
وقسمًاااا بالله في ناس كتير غير مسلمة بتتمنى تكون مسلمة عشان تحس بنعمة الصلاة وتحس باللذة بتاعتها..

طب أنت عارف أن علماء النفس توصلوا إلى أن ملامسة الجبين ( القورة ) للأرض بتسحب الشحنات السلبية اللى في الجسم!!

يعنى مع كل سجدة هتتخلص من أي حاجة سلبية جواك.. طب بالله عليك شفت عظمة أكبر من كدة!، الصلاة محتاجة منك قرار مش أكتر والله.. قرار إنك تبقى عبد لله مش لحاجة تانية.

متجيش وأنت شغال أو بتذاكر وتسمع الأذان تقوم تقول هصلى لما أخلص، مهو العمل عباااادة، أحب أقولك أي عمل يلهى عن الصلاة هو عبادة للشيطان.

وفى الآخر عايزك تركز فـى الحديث القدسي ده كويس أوى، ربك عز وجل قال (إذا تقرب العبد إليّ شبرًا تقربت إليه ذراعًا، وإذا تقرب إلى ذراعًا تقربت منه باعًا، وإذا أتاني يمشي أتيته هرولة).. رواه البخاري.

يعنى كل خطوة هتاخدها ناحية ربنا.. ربنا هيقربلك أكتر وأكتر.