حلقة ريهام سعيد.. «بيض ورقاق»

دنيا تمطر بيض ورقاق
حتتك بتتك ناكل فيه
وجايبة حجارة من سجيل
مالية سحابة طير أبابيل
نازلة تحط العدل سياج
بعد العدل ما تاه أراضيه
قوللي يا باشا تايهين ليه؟
ماشي وشايل طاجن ستك
والعفريت بيحوم حواليك
ويقول هع خلاص م لبستك
شوفوا ريهام هتجيبلك شيخ
أو دكتور هينكد عيشتك
كل ما يطلع علم لفوق
فيه ملايين للجهل تشدك
جبل الحزن طفح م الكيل
إزرع قمحك بلَّه ارويه
حبة عرقك تنضح فيه
وانسى اكوام من بيض ورقاق
عمر السما ما ف يوم ترميه