تعرف «ترقص» بالكلام!!

طول عمري عاشقة النغم
والرقص والكلمة
لكن زماني البجم
واقفلي بالعِنية
وعشان مقدرليش
حظي أني أتعلم
أجمل فنون الرقص
قررت أتكلم
بالعزف ع النغمات
والحرف بيقسم
أوقات بحس أن أنا
ولا أحلى باليرينا
بكتب كلام يتقرا
يتغنى.. بعنينا
والحرف جنب الحرف
سيمفوني أوركسترا
لابس جيبونة لَف
لون فوشيا على أصفر
والسجع بالكلمات
زي الكمان بيحن
يرقص لهم بالذات
تشبيه شقي ويتجَن
ولا الجناس واقف
بين السطور صولو
ووراه قوافي وعُرَب
بيغنوا ويقولوا
أصل الطرب غية
بالذات في أحلامي
والشِعر ده دُنيا
شايفاها قُدامي
لازم أفرفشها
وأديها بياتي
فتفضي مسرحها
قُدامي وتقولي
ليكي البراح وحدك
غَني هنا وصَلي
وأما الحنين ياخدك
للرقص شاوريلي
والكل يعزف لك
تتمايلي وتميلي
يبقى اللي عوزته اتطلب
من شِعري واداني
كل اللي بتمناه
رقصني.. علاني