سكووت... بشويش
أنا أيه وأنا ليه ومش فاهمة إزاي
أنا سكر دايت.. فِ فنجان شاي
أنا صورة رسمها خيال فنان
ونسي يكملها.. وراح مش جاي
أنا ضحكة طفل لقيط للكون
أنا قلب جريء فِ زمن مجنون
أنا حتة صخرة ف وسط الموج
وقارب معووج أنا فيه مسجون
أنا جون جاه فجأة فِ آخر الماتش
أنا ساعة حظ ما تتعوضش
أنا كلمة فِ غنوة ومن غير لحن
أنا زي موبايلي الصيني التاتش
أنا بطلة فيلم من الأساطير
أنا طير مدبوح كان نفسه يطير
أنا طوبة ووقعت من فوق سطح
ولقفها جبان خبطاته كتير
أنا عسكري مات جوا الشطرنج
أنا قرص مسكن زي البينج
أنا لمبة نيون من غير مسمار
أنا فيلم قديم بس جديد لانج
أنا سمكة قرش فِ فيلم الرعب
أنا تهمة قتل ومن غير ذنب
أنا حِسبة من الأول مش صح
أنا لحظة سلم فِ وقت الحرب
أنا: ولا حاجة
