عندي مشروع يهم مصر كلها.. مين يساعد؟
الحاجة أم الاختراع، جاءت إلىَّ فكرة إنشاء بنك للدواء، حينما علم أحد أصدقائي بأن عنده مشكلة صحية، وكان يحتاج إلى دواء غالي الثمن لم يستطع أن يحضره لنفسه وكنا محتاسين معاه في العلاج، من هنا جات لي الفكرة.
كلنا عارفين بنك الطعام، ففكرته قايمة على جمع الطعام الزائد من الفنادق وإعادة تجهيزها وجمع التبرعات المالية وشراء الأطعمة وإعطائها للفقراء والمحتاجين.
من الفكرة دي جات لي فكرة بنك الدواء، وهو عبارة عن جمع الأدوية الزائدة من الأسر بالمنازل بدون مقابل، وكذلك جمع عينات أدوية من الأطباء في العيادات والمستشفيات، وهنحاول نلف على شركات الأدوية.
يا ريت نتعاون مع الشباب الصيادلة؛ لأن هيكون عندهم خلفية وخبرة كبيرة عننا في موضوع الأدوية، وذلك لفرز الأدوية ومعرفة المتاح منها في السوق ومدى صلاحيتها أيضا، لكن عندي فكرة أجن بصراحة، وهو أننا نلم شباب الحركات اللي عاملة ثورية علشان تشتغل معانا، إذا كانوا أصلا بيحبوا حاجة اسمها مصر زي ما بيقولوا..
اللي يعرف يكلم وعنده ملكة الإقناع حيروح للدكاترة، واللي ما يعرفش يبقى معانا في الفلاير وجمع الأدوية من المنازل والتخزين والتوزيع، مبدئيا أنا بفكر نبدأ من عاصمة مصر الثانية الإسكندرية، لو الدنيا مشيت ممكن نتوسع في باقي المحافظات.. على فكرة الموضوع مش حكر عليا يعني اللي يقدر ياخد الفكرة وينفذها بطريقة أحسن مني حكون سعيد جدا لأنها اتنفذت.
