البيه العراف
عن ناس سرحت ويا خيالها
و بتقتل فى بنات أفكارها
و تصدق فى كلام تخاريف
وعن ناس غلبانه تصدقها
من كلمه هتقدر تكسبها
والناس التانيه دى ملعونه
وايمانها ضعيف
فنجان مقلوب و طبق فاضى
و البيه العراف قال مش راضى
يحكى المضمون
علشان شايف حزن كبير
بيسابق صوت الغِربان
و بيقتل أحلام الخير
و الشر هيبقى الكسبان
و فى جنب الفنجان من جوه
قال شجره و تحتها مدفون
أوراق العمل المسحور
و اللون الأسود منشور
حوالين سكه سفرها طويل
و بيحكى من غير تفاصيل
و زبونه مِركز فى كلامه
أو واقع تحت التأثير
فيقوله طلباتك ايه
أؤمرنى يا سَيدنا و قول
و أنا ألبى على طول و أجيب
انا خدامك
انا محسوبك
فيقوله على فرخه يتيمه
على نمله ملهاش اخوات
يفرشله سجاده قديمه
و يقوله دا بساط مسحور
و هلف الدايره و هتدور
و بايدى هتعيش مسرور
و هنعملك دقة زار
علشان كام عفريت جبار
لابسينك من غير انذار
و هولعلك أحلى بخور
و هاتمتم بكلام على نار
تتحول فجأه لأطلال
و رمادها بَركته تشفيك
و هتنزل ساعه الفجريه
تغسل رجلك جوه النيل
و العصريه تعدى عليا
هاعملك بالشَبَكه حِجاب
يفتح عندك أيها باب
طب بالذمه يا ناس
مين صدق؟
إن القدره لغير الله
و ان المكتوب مش هتشوفه
لو سلمت لعقل مُنجم
كُتر الجهل فى قلبه عماه
مش هيفيدك مخلوق زيك
دى الرحمه من عند الله
