"العكسيات" قصيدة عامية لـ "خالد الحداد"

لما القاتل يبقى مُقاتل
وأما المذنب يبقى بريء
وأما الحق يعوم ع الباطل
يغطس فيه ويقبْ غريق
وأما النُور الكاشف ضِله
تيجي تتفاجأ أنه حريق
وأما البحر بكل جنونه
صِدره يضيق من كتر الضيق
وأما ميزان العدل يكون
عكس الشيء بيكون الشيء
يبقى أنا وأنتَ أيوة يا صاحبي 
جينا وتُهنا وما لنا طريق

لما المَاضى يبقى الآتى
وأما الحاضر يبقى هناك
تيجي تبص تشوف كالآتي
أن نُجومك مش ف سماك
وأن سَماك دي أصلا أرض
لكن مَليانة بأسلاك
أسلاك بتخربش وتعضْ
أسلاك بتؤدي لهلاك
وأما تسأل أيه اللي رماني
عالدنيا اللي شيطانها ملاك؟
تِسمع صُوت عَقلك بيقولك
إن دا قَدرك اللي رمااااااااك

لما البحر يقلب بركة
وأما المَرسى يبقى غويط
وأما الحاكم يبقى مُحاكَم
وأما الأهبل يبقى حويط
وأما الفارس يبقى فريسة
وأما الصعب يبقى بسيط
وأما الجاهل يفخر جدا
أن بجهله بقى له صيت
وأما الدنيا تِرمي سنينك
قدام عينك جوا محيط
ييجي الحوت اللامع نابُه
يشتري عمرك بالتقسيط
وأما الشاعر ابن الكِلمة
يقول الحكمة يقولوا عَبيط
وأما زمانه ينزف روح
ع اللي حصل له ودمُه يشيط
يخبط وِش الُدنيا بكفه
تِسمع منها نواح وصويت
يجري بفرسه الأبيض عَنتر
وسط وحوش وكلاب الغيط
يقول للشاعر _لا_لا تَحزَن
واصبُر فيما أنتَ بُليت
واوعى تبطل تِكتب شِعرك
وابنِ قصايدك بيت ورا بيت