جوابات «عيد السوهاجي» لـ «بدرية عبد الستار» 3

زوجتنا الغالية . بدرية عبستار، وصلني جوابك يا ام دياب، آه يا بت علي مرار الغياب، اه لو تشوفي دموعي ليلة الخميس خسيس والله يا وكل العيش خسيس..

اوعي فكرك يروح بعيد أنا ليلة الخميس بافتكر إن الجمعة صابحة بابكي بدموعي لما افتكر لمتنا تحت النخلة الطارحة اه يا بت المرحوم ساعة ما باقوم م النوم والقاكي يا بدارة عني بعيد واقول يا مرار اللي خلفوك يا عيد وادي الطين اللي علي راسك يا عيد.

اتوحشتك قوي يا ملكومة وزي ما قالت بت إبراهيم " ثومة " بعيد عنك حياتي عذاب، هانت يا بدارة وقربت أجيلك واخدك فحضني
ولا أقولك بلاش عشان الواد بن الكلب اللي بيقرا الجواب ما يفهمشي وعلشان لما اجي منه ما اكشمشي
معانا في القناة ولد خالتك قناوي

امبارح بيقولي مروح يا عيد ع العيد ولا مش ناوي قلت له يا مهووس ولد المهووس ما انت مش مجوز كنت عرفت ان البعاد يا ما يا ولدي بيكسر نفوس ملعون ابوك يا وكل العيش ملعون ابوكي يا فلوس بدارة يا نور عيني انا جاي ع العيد فامرب يا بت الناس
تلاقي القرشين اللي انا جايبهم قليلين

انا اشتريت شهايد استثمار بألفين ليا وليكي ولولدي دياب واقولك يا بدارة في اخر الجواب وحشاني يا نور عيني وحبك جوايه بالقنطار

يصل ويسلم ليد زوجتنا بدرية عبستار اللي ساكنة ف سوهاج قرب المطار