ماهينور المصري في أول تدوينة لها: «مش خايفين ومكملين»

قالت الناشطة الحقوقية ماهينور المصري في أول تدوينة لها على "فيس بوك" بعد خروجها "عدنا بعد التايم شير في بورتو الأبعدية... ومعلش هقرفكم تاني".

وأضافت:" أول لما عرفت موضوع وقف التنفيذ انتابني شعور بالرعب شديد.. الحقيقة أنا لما قررت أحضر جلسة معارضتي كانت عشان نبين مش بس ظلم قانون التظاهر ولكن كمان عشان نبين للناس أن النظام مش بس استبدادي ولكن كمان مش عارف بيعمل ايه".

وتابعت ماهينور:"طبعًا ناس حتقولي خللي عند أهلك دم دول لسة مطلعينك والحقيقة ده موضوع بياكد وجهة نظرنا أن الموضوع كله مسيس ومالوش دعوة لا بقانون ولا بجلب استقرار لأنهم بكل بساطة عايزين يعملونا وردة في عروة الجاكيت للنظام.. يطلعوا كام شخص برة السجن وكان النظام ديمقراطي في حين أن فيه آلاف في السجون ".

وقالت:" أصل ايه المنطق أن لؤي وعمر حاذق وإسلام حسنين وناصر أبو الحمد يتايد عليهم الحكم بسنتين وانا انزل ل 6 شهور وبعدين آخد وقف تنفيذ مع اننا في نفس المركز القانوني !! المهم أن طبعا الضغط اللي عملاه حملات زي جبنا اخرنا والأمعاء الخاوية بيجيب تأثير ولازم نضغط لإخراج كل المعتقلين المظاليم ".

وأضافت:" الحرية لعمر حاذق ولؤي القهوجي وإسلام حسنين وناصر أبو الحمد ومحمد سلطان ومحمود نصر ودومة وعادل وماهر وأمام وإبراهيم اليماني وسناء سيف وسار سلام وناهد بيبو وسماح سمير وأسماء حمدي وهنادي محمود والاء محمد وعفاف أحمد ورفيدة إبراهيم وفاطمة نصار وهبة سامي والسيدة فودة ووداد كمال.. الحرية لكل المعتقلين.. لا تخافوا من الذين يحبسون الجسد.. مش خايفين ومكملين".