قصيدة "الناحية الغلط" للشاعر صالح الغازى
أخدت من السكوت الرزانة
وأخدت ودانى من الميكروفون شكلُه
تستقبل الكلام ولا تفوتش
اشتغلت أعصابى للكلام وزَّانه
أنا كنت متدهور
ولحقت نفسى قبل ما اتهور
عينيا مفنجله
مش ملاحقة الصور!
دى دهورة من نوع جديد والّا رجوع لورا ...؟
قادر أركز فى العينين
أقرا اللمعان والمطفى
يظهرلى منها المخفى
لكن عنيا ما تخبيش
زى شباك مفتوح الشيش
ويا دوب الإزاز مقفول
عشان يمنع الهوا الساقع
قادر والّا مش قادر
ياعم يا شاعر
يا بو الكلام واعر
والفعل قليل!!
الزمن مش خليل
ده الزمن نِدّى
ساند كعابه على زندى
سايل لعابه على خَدى
طب أعمل إيه؟
غير الكلام ده
والسكوت ده
كل ما القى شىء عدل
يصحى تانى يوم معووج
عقلى خدل من كتر ما بافكر
باين عليا بادَوَّر فى الناحية الغلط
أنا وانتى يا دنيتى
زي الندى ع الزلط
لو تعرفى نيتى ...؟
