فضفضة عن حاجة ماتخصكش

مايخصش حد أني لابسة حجاب وشعرى باين من قدام.. مايخصش حد لبسي ضيق ولا واسع.. مايخصش حد شكلي ومكياجي ولا أي حاجة تخصني أنا تحت بند 'أصل أنا بنصحك ولا أصل إحنا بنشوف أشكال تقرف في الشارع'.. مايخصش حد أني بلبس قمصان وكرافت وجينس 'أنا حرة'.

أنا حرة مادام بحترم نفسي وعارفة حدودى برا وجوا!!
ومادام ببص في مرايتي وبكون راضية عن نفسي 'أيا كان شكلي'.

مايهمنيش رأيك!! ولو بتضايق من شكلي فربنا إللي أنت بتنصحني باسمه بيقولك 'غض بصرك'
ولو شكلي مش بيعجب معاليك علشان بطلع شعري من الطرحة فأنا ماطلبتش منك أصلًا تعجب بيَّ!!
ولو بتتكلم كاحترام لحجابي ولديني.. فأيه رأيك تحترمه أنت الأول وتغض بصرك!!
مش ده كلام الدين إللي أنت بتتكلم عنه!!

وبعدين هو أنا علشان محجبة أحترم ديني ولو مش محجبة من نفس الدين فماحترموش!! طب إزاي هو الدين بيقول كده.. طيب ليه غالبًا ما الانتقادات بتتوجه للمحجبة ولشكلها!! يعني برضه هتقولي بتمثل الدين طيب وإللي مش!!  مش من هنا يعني!!

احترام الدين يا محترم يا إللي بتفكر بالطريقة المريضة ديه مالهوش علاقة بحجاب ولبس!!
احترام الدين بيكون نابع من إيمانك بالدين ده.. حاجة بينك وبين ربك 'أيا كان دينك' فعلاقتك بربك ماتخصش حد زي ما لبسك وطريقتك ماتخصش حد.

فلو كمثال بصينا للبعض من غير المحجبين وللبسهم ولدينهم هتلاقي أن العلاقة بينهم زي العلاقة بين حريتي واختياراتي ورأي حضرتك.. مالهومش علاقة ببعض.

الحجاب عمره ما كان أو هيكون "دليل" على أي حاجة.