مولد الكهرباء على مين؟؟

بدأت أبحث بجد عن مولد كهرباء علشان أشتريه بس الميزانية مش مكفية والبند ده مكنش معمول حسابه خالص، وبعدين هو أنا أصلًا كنت هتوقع في يوم أني أشتري مولد كهربا، عمومًا خلاص أنا قررت ولما الواحد يقرر لازم ينفذ، أومال أيه، ما هو أصل الواحد زهق من القاعدة بالفانلة الحمالات في البلكونة أو على سلم العمارة قدام الشقة منتظر الكهربا لما تيجي، ده بالنهار أما بالليل أفضل ألف حولين نفسي رايح جاي في الضلمة زي الشبح لحد ما سيادة الأخ اللي شد السكينة يصحى من النوم وينور لنا حياتنا..

الحمد لله دلوقتي فيه قنوات تليفزيون بدأت تعمل مسابقات والسحب فيها على مولد كهربائي وبيني وبينه رسالة لـ 0900، بس يا ترى هجيب البنزين منين، أنا سمعت أنهم هيعملوا طابورين في محطات البنزين، واحد للعربيات والتاني للمولدات بشرط أنك تجيب شهادة من الوحدة المحلية اللي أنت تابع ليها ماضي عليها اتنين موظفين تقول إنك من مُلاك مولدات الكهربا وهتستعمل البنزين ده لتشغيله لحد ما الحكومة تضيفه على كروت دعم الطاقة أو بطاقة التموين.

أنصح أي أب أو أم أنهم ميدققوش أوي مع عرسان بناتهم في موضوع المهر والشبكة، ده مش زمنه خالص، أهم حاجة تتفقوا على مولد الكهربا اللي هيجيبه العريس لبنتك وهيكون كام كيلو وات، أومال أنتوا فاكرين الحكاية أيه، قطع كهربا وخلاص، لأ ده بكرة الحكومة تطرح مناقصة لبيع توكيل صيانة مولدات الكهربا وأهو كله يسترزق وسلام بقى لأن الكهربا قاطعة عندي وبطارية اللاب خلصت أشوفكم لما الكهربا تيجي إن شاء الله ده إن جات، الوداع.