"نجاد البرعي": اتشتمنا من كل الأنظمة وحاليا من السيسي
انتقد الحقوقي نجاد البرعي، مستشار البرامج بالمجموعة المتحدة، وسائل الإعلام والأحزاب السياسية، قائلًا عبر صفحته الرسمية بالفيس بوك: "أنا بصراحة قرفان من الناس المعارضة قبل الحكومة والإعلام الخاص قبل الإعلام الحكومي".
وقال البرعي في نص تدوينته التالى: "هاقول حاجة ومتعتبرونيش متخاذل أو متشائم أو صايم أو أي حاجة.. أنا من سبتمبر ١٩٨١، وأنا باحاول أصلح في البلد دي بكل طريقة، مرة بالخناق ومرة بالمحايلة ومرة بالكتابة ومرة بالدفاع في المحاكم ومرة بنزول المظاهرات ومرة بالقعود في البيت، وكتب في أغلب الصحف وطلعت في الإعلام لدرجة أن الناس بقت قرفانة من وشي وقالوا عليا باسترزق من الإعلام".
وأضاف "اشتغلت في حقوق الإنسان وحاولت آخد فلوس من الخواجات عشان نعمل مشروعات قوانين وندافع عن المحتجزين ؛ اتشتمنا من كل الأنظمة، نظام مبارك طبعًا والمجلس العسكري ومرسي وعدلي منصور، وحاليًا الأخ السيسي...كل الأنظمة اختلفت في كل حاجة واتفقت على حربنا".
وتابع البرعي: "دافعت عن ناس وشتموني؛ ساعدت ناس وبعد كده حاولوا يتآمروا عليا؛ بعضهم دلوقتي نجم وعامل نفسه وطني وأنا عارفه من أيام الشبشب والجلابية....حياة طويلة وعريضة وعميقة، خسائرها أكبر من مكاسبها وفشلها أكثر كثيرا من نجاحها".
وتساءل البرعي قائلًا: "أكمل الحرب دي وأموت مقهور من آثار الهزيمة، التي يبدو أن لا انتصار لها ولا أروح أقعد في الظل وانبسط بالباقي من حياتي....أنا بصراحة قرفان من الناس المعارضة قبل الحكومة والإعلام الخاص قبل الإعلام الحكومي....ما فيش حاجة بتتصلح ولا البلد راضية تطلع خطوة لقدام والفاضل من العمر مش قد اللي راح الموضوع ده مش لاقي اجابة عليه اعمل إيه؟ "
